par Tʋʋlg kiuug rasem a 4 yʋʋm 2023 soabã, FESPAKO naoor 28 paga a kʋlens Palɛdɛspoor sẽn be Waga demillã. Yaa Burkĩna Faso taoor soabã Kapitɛnd Yɩbrayɩɩm TARWAR n lʋɩ a pagbã taoore.
Sĩnim dãmbã yɩɩ bãmb ka tɛk n da kẽ wagsgã pʋga. La wagsgã sẽn wa n sa, bʋ-kaoodbã zĩndame n bale n wa wilg tɩ yaa Tinizi tẽngã sĩnim manada a Yusɛf SEBI n lʋɩ taoore ne a sinma yʋʋr b sẽn boond tɩ Askal. Askalã yaa sĩnim naandem b sẽn boond tɩ figsẽo wã. A sĩnmã wã gomda vaeesg b sẽn maan zag-gũud a ye b sẽn maan kaalem zag-vɩʋʋg pʋga. Yaa Tinizi tẽngã taoor soab kʋdg a Bɛn Ali kaalem loogr poore, la polɩɩs rãmbã pak vaeesgo, tɩ vaeesgã wa ne neb a taab kũum b sẽn da ka tar kibare.
Yaa rẽ tɩ sẽn zĩnd n ges-b tʋʋmdã balb wilg t’a n segd n paam kũun ning b sẽn boond tɩ Etalõ doorã, sãnem wed-moaaga, la milyão 20. Sĩnim kãng poore, yaa Burkĩna Faso sĩnim maanda a Apolind TARWAR sĩnmã ning b sẽn boond tɩ SƖRA wã n pʋge. La yẽ paama milyão10 n paas zũud wed-moaaga, b sẽn boond tɩ Etalõ darzã wã. Burkĩna Faso sĩnim maandba wilga b sũ-noog ne b tʋmd-n-taagã, a sẽn tõog n paam n ta yiib-n-soab zĩigẽ wã. A Taleb Kant sẽn ya Burkĩna Faso sĩnim maandaa ye wilgame t’a sũur yaa noogo, Burkĩna Faso sẽn ta yiib-n-soab zĩigẽ wã. A pasaame tɩ nin-buiida fãa ra be a Apolind TARWAR poorẽ, la bʋ-kaoodbã me tʋma b tʋʋmde.
A Bintu Gɛllo, wilgame t’a sũur ka sãam wʋsg ne Burkĩna Faso sẽn ka paam pipi zĩiga a ye. Bala sĩnim ning a Apolind TARWAR sẽn yiisã kɩtame tɩ nin-buiida fãa naag n taab n zĩnd a poorẽ. A wilgame tɩ wʋm taab sɩd tõe n zĩnda Burkĩna Faso. Tẽns sẽn wa n zĩnd FESPAKO naoor 28 soabã yɩɩ Kodenvoaare, Kɛɛde, Senegalle, Gine la Mali. FESPAKO wã taoor soab a Muusa Alegs SAWADG wilgame tɩ sĩnma wã tigr naoor 29 soabã na n sɩnga wao-fugdg kiuug rasem 22 n tãag tʋʋlg kiuug pipi daare yʋʋm 2025 soabã.
A Robɛɛr Kiswẽndsida KABOORE
