Burkĩna Faso tʋʋm-noor ning sẽn get kibaya kũun na tũ sor tɩ b boond tɩ Seɛsse  (CSC) wã,  ne Minitɛɛr rãmbã maana a Toma Sãnkar ne a tũud-n-taas piig la a yiibã waoor tẽegr naoor a yiib soaba

Yʋʋm-sar kiuug rasem a 4 yʋʋm 2025 soabã Burkĩna Faso tʋʋm-noor ning sẽn get kibay kũun na tũ sorã taoor soab a Wẽndengũudi Lui Modɛɛs Wedraoog zẽka a naoor n tɩ zĩnd Memoryall Toma Sãnkara tɩ b maan kiuug pʋgẽ pipi lamus b sẽn yãk n waoogd a Toma Sãnkar ne a tũud-n-taas piig la a yiibã b sẽn kʋ wã waoor tẽegre. Lamusã yʋʋm-sar kiuug rasem a 4 soabã yɩ a tẽegrã naoor a yiib soaba. Tẽeg-kãng soabã yaa Seɛsse CSC taoor rãmba, la kiba-kɩtbã ne Minitɛɛr dãmbã n maan-a.

CSC taoor soab a Wẽndgũudi Lui Modɛɛs Wedraoogo, ne kʋdemdã, kiba-kɩtbã la gilg-n-ges yel-soalma Miniisr a Pẽgdwẽnde Zɩlbɛɛr Wedraoogo, n paas Miniisr sõangda Amadu Diko sẽn get gʋʋlgã, ne Mali Miniisr a Bukar Dɛne sẽn get koomã ne kʋʋra wã, la Nizɛɛr neb zẽka b naoor n zĩnd zĩigẽ wã.

Miniisr Pẽgdwẽnde Zɩlbɛɛr Wedraoog koeesã pʋgẽ, a pẽga Kapitɛnd Yɩbrayɩɩm Tarwore, a sẽn yãk yam tɩ kiuug pʋgẽ pipi lumus fãa bɩ Manitɛɛr dãmbã  maand waoor n tẽegd Kapitɛnd Toma Sãnkar ne a tũud-n-taas piig la a yiibã b sẽn kʋ wã yelle. A wilgame tɩ waoorã, yaa na-kẽnd-sõngo, sẽn na yɩl tɩ b rɩk yam a pʋgẽ, n tõog n kell n kẽng ne yam nins Kapitɛnd Toma Sãnkar sẽn da gãneg n na n tʋmã. Miniisrã togsame tɩ Memoryall Toma Sãnkara nin-naand-kasengã meeb ligd sẽn kẽ nan ka yɩɩd koabg  piig 10 % pʋgẽ ye, tɩ yaool n yaa Milyaar ka tɛk la b rat n paam n me-a. Yaa rẽ tɩ b rat tɩ ni-buiidã fãa kẽes b  toog tɩ b tõog n baas-a. Miniisr Pẽgdwẽnde Zɩlbɛɛr Wedraoog boonda nin-buiidã tɩ b kɩs b nug bũmb tɩ b tõog n me Memoryall Toma Sãnkarã t’a yɩ wa b sẽn datã.

Miniisrã koees poore, CSC taoor soab a Wẽndgũudi Lui Modɛɛs Wedraoog me rɩka koɛɛga. Yẽ me koeesã pʋgẽ, a kell n pẽg tẽngã zãadb yam yãkrã. A wilgame tɩ b yam yãkrã boonda burkĩn-bi wã la nin-sabls tẽnsã kamb tɩ b mobg taaba, la b naag taab zĩig fãa n zab ne nasaar wẽnsã ne b yam-soaadɩ wã, tɩ Kapitɛnd Toma Sãnkar sẽn da tuk sor ning n dat tɩ b vʋɩɩmd ne burkĩnd la zug zẽkrã tõog n yɩ vẽenega.

A Wẽndengũudi Lui Modɛɛs Wedroog ratame tɩ nin-buiidã kẽes b toog ne b nug bũmb tɩ Memoryall Toma Sãnkara wã, na n sõnga nin-sabls tẽnsã zãadb tɩ b politikã toeem na-kẽndre, n kẽng taoore, ne sɩda, la bʋ-tɩrse, tɩ b zamaanã gãand bãane.

A Pẽgdwẽnde Erik Zĩnaaba