par Tʋʋlg kiuug rasem 11 yʋʋm 2024 soabã, Burkĩna Faso sull ning sẽn get ballã yellã taoor dãmb sega kiba-kɩtbã. Segã pʋgẽ a Lazar BÃNSE wilgame tɩ yaa Brama TARWORE la b yãk t’a yi “etalõ” wã bal karensaamba.
A Brama TARWORE yɩɩ Burkĩna Faso bal tãonda, n yaool n na wa lebg bal-karensaamba. Yaa ned sẽn mi Burkĩna Faso ballã tãoog na-kẽndr sẽn yaa a soaba. A Kamu Malo nug-tikrã sẽn wa n sa yenda la b yãk t’a leda zĩĩga hal n wa tãag a Ibɛr VELUD waoongo.
A rɩka koɛɛg n wilg tɩ yẽnda pʋʋsda federasõ wã taoor soab ne a poorẽ dãmbã, b sẽn sak n kõ yẽnda sɩdã. A wilgame t’a na n tʋʋmame tɩ Burkĩna Faso ballã tãoob tõog n paam pãng n paase. Sẽn yɩɩd fãa a na n maoome tɩ « Etalõ » tõog n paam n kẽng « KAANDÔ wags taab sẽn na n zĩnd Marok yʋʋm 2025 soabã sẽn watã. A Brama TARWORE pẽga a Kamu MALO, la a Ibɛr VELUD sẽn deng yẽnda tuʋmdẽ wã. Bal-karensaamb paalgã pasaame tɩ yẽnda na n tʋʋmame tɩ waoog taab zĩnd bal-tãodba ne taab sʋka, bala wʋm taab sãn ka be tʋʋmdã ka tõe n yɩ soma ye. A Brama TARWORE kell n kẽnga taoor n pẽg sodaasã la a wilg tɩ yẽnda tagsda kɩɩbsã la pog-kõmba yelle. ” Federasõ” wã taoor dãmb ne ministɛɛr ning sẽn get yĩn-wɩsgrã yell ra wilgame tɩ b na n yãka tẽnga biig t’a reeg ” Etalõ” wã n zã. A Lazar BÃSE wilgame tɩ bãmb sẽn yãk a Brama TARWORE wã, a yaa ned sẽn mi Burkĩna Faso ballã nug-gãag sẽn yaa toto, bala a zãa “Ekip” rãmb wʋsg tẽnga pʋgẽ.
A Kiswẽndsɩda Robɛɛr KABOORE
