par Tʋʋl-nif kiuug rasem 30 yʋʋm 2025 soabã, a yɩɩ daar sẽn ka wẽnd a taab Burkĩna Faso la ãnduni wã tẽns a taab pʋsẽ. Yaa Wanyiyã lagem-n-taar sull kaseng ning b sẽn boond tɩ SENAVESE wã n bool nin-buiidã tɩ b sak n yi n zulum yiib n wilg tɩ b bee ne tẽngã taoor soaba, Kapitɛnd Yɩbrayɩɩm TARWORE. Waogdgo, yɩɩ Palaasdelarevolisẽo la b seg taaba. Yɩɩ pagba, rapa, karen-biisi, la goosneerã taoor soab a Zã Emanwɛɛl WEDRAOOGO, n paas miniisr dãmb kẽere.
Koeesã rɩsg sẽn wa n sɩnge, SENAVESE wã taoor soaba a Onoore SAMADULG wilgame tɩ ninbuiidã yiime n wilg b belem ne tẽnga taoor soaba, la b leb n wilg nasaar wẽnsã la neb nins fãa sẽn dat n sãam Kapitend Yɩbrayɩɩm TARWORE naama tɩ b gũus tɩ ninbuiidã yasa a wɩla.
Sãn yaa ne Amerik Zenerallã a Mikayɛl Lãgle sẽn wilg tɩ kapitend Yɩbrayɩɩm TARWORE rɩkda Burkĩna Faso sãnma sẽn na n yɩlẽ n paam n koglg a mengã , n basd ninbuiidã, a wilgame tɩ yaa paoogr meng a sẽn paoog tẽnga taoor soaba . A Onore Samadulgu sokame gese rẽn yĩnga Burkĩna Faso naaga Amerik soolme ? bɩ a Lãgle rat n lebga Burkĩna Faso neda ? sãn mikame t’a yaab rãmba sẽn yi nasaara nins yẽ sẽn yaa b yamb rũnda rũnda wã ra yaa Burkĩna Faso faso neba, bɩ a wilg tɩ rẽnda tõe n sõngame t’a paam n yi Burkĩna tẽng n bɩɩga. A wilgame tɩ nasaar wẽngã, ne aa tʋʋmd n taasã sẽn yaa nin-wẽnsã ka tar b zĩig Burkĩna Faso ye.A kẽnga taoor n wilg tɩ AYEYƐSÃ ninbuiid gãda taaba, rẽnd nasaar wẽngã ne a tẽng-n-tɛɛndbã fãa ka na n tõog tɩ b raabã pid ye.
A Labidi NABA, SENAVESE wã tãb biig a yembr wilgame tɩ tigs kãnga yaa ãnduni wã fãa tigsga, a tʋlsma yaa ninbuiidã fãa yãag tẽnga taoor soaba so-sõng ninga a sẽn dɩka zugu, la b wilg nasaar wẽengã, sẽn tar sɩlem ninga n dat n sãam tẽngã t’a raabã ka na n tol n pid ye. A kẽnga taoor n paas tɩ sãn n yaa ne yẽ, koeegã ka lʋɩ muk tʋbrẽ ye, bala zama wã sẽn yi wʋsgã yaa kibar sẽn kõt bɛ wã t’a maan gũusgu.
Gosneerã taoor soaba a Rĩmtalba Zã Emanwɛl WEDRAOOG rɩka koeeg tẽnga taoor soab yʋʋr yĩnga. A koeesã pʋgẽ a reng n tẽega naong ning yaab rãmba sẽn paam yemdã wakatã, ket n yaa na kẽnd kãng la b sẽn le rat n dɩkã, bala ninsabls wʋsg sẽn be nasaarã wã maasme n ket n dat n zãmb b saam biisã n paam b noor rɩɩbo.A wilga neb nĩns fãa sẽn dat Burkĩna Faso ne wẽngã tɩ b gũus b meng tɩ wakat kãng loogame, bala Burkĩna Faso sẽn vɩɩmd bũmb ning yʋʋmd 1987 soabã ka na n le yɩlem ye. Yʋʋm 1987 soabã, nasaar wẽengã talla wogb bũud toor-toore, n wilg t’a Tama SÃNKAR yaa naab sẽn nams a ninbuiidã la a kʋʋd ba, woto yɩɩ sabaab t’a tunug ninsabls tẽns neb kẽere la Burkĩna Faso tẽng kamb sẽn ka tar tagsg tɩ ka b mensa bal n paam n kʋ-a, rũnda rũnda wã, tõnd be yʋʋù 2025 soabã. A kẽnga taoor n paas tɩ ninbuiidã segd n tik n yikame n naag taab n yals tẽnga taoor soab poorẽ, bala yaa zunoog meng-meng ne-ba tɩ b paam taoor soab sẽn yaa bi-bɩɩga n leb yaa ned sẽn yaa ges yɩɩg soaba.
A Rĩmtalba Zã Emanwɛll WEDRAOOG kell n dɩka tẽnga taoor soab koees n taas ninbuiidã fãa a wilgame tɩ tẽnga taoor soab yeelame t’a taas ninbuiidã ta sũur ka kiuusd ye, tɩ ba tʋʋm yoodã bũud toor-toor sẽn tʋʋmdã, a pɛlg ket n yaa kãe-kãe, t’a na n tʋʋm tẽnga na yi nin-wẽnsa nugẽ, la a tõog n kẽng taoore.
Gosneerã taoor soab pasaame tɩ ninbuiidã sẽn yi wʋsg woto wã yaa bũmb sẽn paasd tẽnga taoor soab raoodo, tɩ bala ninbuiidã sãn be a poorẽ, raabem ka be ye. A baasã a koeesã n wilg tɩ zaama wã sẽn tigs woto wã na n namsa neb –kẽere, kẽer na n kẽeme n mak gõeem n koonge.
Tʋʋl nif kiuug rasem 30 yʋʋm 2025 soabã yaa raar sẽn ka na n tol yiime bala, Burkĩna Faso sẽn yãk a toogo, ãduni wã tẽns wʋsg pʋsẽ ninbuiidã yiime n wilg b belem ne Kapitend Yɩbrayɩɩm TARWORE, bala a yaa ned la ning sẽn na n kɩt tɩ ninsabls tẽnsa tõog n paam b soog-n-meng sɩd sɩda, la b tõog n kẽng taoore.
