par Wao-fugdg kiuug rasem 28 yʋʋm 2025 soabã ministɛɛr ning sẽn get kaorengã, la buudã goam na kẽng taoorã sigla seg-taab-kaseng Waga deemill sɛkã roogẽ. Tigsgã taoor yɩɩ gosneema taoor soab a Rĩmtallba Zã Emanwɛll WEDRAOOGO, tɩ ba-yãkdgã ya a Zak Sostɛnd DẼNGARA, minisr ning sẽn get kaorengã la buudã goam na kẽng taoorã. Gom-zut b sẽn tik n maan tigsgã, yaa «Afirik zamaana buud goama: koees sẽn na wa ne manegre, bʋ-sɩd la nin-buiidã burkĩnd pukri, tɩ d me Afirik ning tõnd sẽn datã». «Buudã goam bee sʋka : Ned fãa buud gomd daar sẽn yãk n kõ ãndũni wã yʋʋm pissi la a nu kɩdengo».
Gosneemã taoor soab sẽn lʋɩ tʋʋmdã taoorã, a rɩka koɛɛg ne moore. A koɛɛgã rɩkr wilgame, tɩ wakat sẽn looge, karen-dotã pʋsẽ, karen-biig sã n da gom buudã gomde, b sɩbgd-a lame, hal n ning-a bãnd t’a taabã laad-a. Rẽ fãa yaa nasaara wã sẽn da kẽes nin-sablsã zutẽ,
tɩ b yĩm b buudã gomde, la b rɩk yẽ rẽ wã, t’a paam n maan nebã a yembse. La rũndã-rũndã, nin-sablsã nin pukame. Rẽ n so tɩ b rɩk na-kẽnda n kẽesd buudã goam karen-dotã pʋsẽ, la tẽngã tẽn-kugr pʋgẽ. Na-kẽnd-kãng wilgdame tɩ d raabã sẽn ya na lebg d sẽn yiẽ wã, a na n paama pidsgu. A Rĩmtallba Zã Emanwɛll WEDRAOOG kosa nin-buiidã tɩ b tik b buudã goama, tɩ rẽ bal n tõe tɩ b tẽngã kẽng taoore, a yidgrã wɛɛngẽ.
Buudã goam ra-kasengã siglg taoor soab a Awa Kẽndrbeoog wilgame tɩ yaa sũ-noog ne-ba, tɩ bala gosneerã taoor soab sẽn zẽk b naoor n wa lʋɩ tigsgã pʋgẽ. Rẽ zoe n yaa bũmb sẽn wilgd tɩ buudã goam rɩk n kẽes sʋkã be a na-kẽnd-sõng zugu. A kẽnga taoor n paas tɩ nin-sabls tẽnsã rãmb segd n tika b kʋdemdã, la b rog-n-mikã. La b sã n dat n maan rẽ, rẽndame tɩ b tik b buudã goama. Bala, «pag ka geta a pog-to peoogo, n lub a wam zaok ye». A koeesã baasgẽ, a wilgame tɩ nin-sablsã ka tõe n yidg tɩ b sã n ka b tik b buudã goam ye.
Tigsgã pʋga, karen-biisã maana reem n bẽd n wilg nin-buiidã tɩ buudã goam tara yõodo.
B kell n wilga buudã goam yõod sẽn tõe n kẽng ne ninsaal taoor toto. Tigsgã baasa ne sũ-noogo, tɩ b kõ taab sɛk yʋʋmd sẽn wate, n na n le segd taab rasem a yopoe wã b sẽn yãk tɩ ya nin-sabls tẽns buudã goam tẽegrã.
A Zill KAFAANDO, ne a Pẽgdwẽnde Erik ZINAABA
Le Premier ministre, Rimtalba Jean Emmanuel Ouédraogo, a présidé, le vendredi 28 février 2025, la cérémonie commémorative de la Semaine des Langues africaines et de la Journée internationale de la Langue maternelle. Cette activité, tenue à Ouagadougou, a connu la présence de plusieurs membres du gouvernement et de l’ensemble des sous-commissions des langues existantes au Burkina Faso.
