ADIG tʋʋmdã sɩngre, yaa pag a yembr n wa n be Buls komindã pʋg n kẽnd n gilgdẽ. Pagã ra bẽeda nen-yiling bãaga. La sẽn wa n be n beẽ, pagã wa n tara pʋga. A sẽn bẽed nen-yiling bãag la a tar pʋgã, Misẽo Masɛɛr peelsã sẽn da be Bulsã tall a gũusgu, ne yagb bilf-bilfu, t’a wa tɩ roge, tɩ b reeg a biigã n kẽng Waogdg n tɩ kɩs  tɩ b zã-a.

B sẽn deeg a biĩgã n kɩs Waogdg tɩ b zã wã poore, ka yɩɩg kiuug a tãab bɩ naas pʋgẽ, pagã le rɩka pʋga, tɩ Misẽo rãmbã le sɩng-a  yagbo. Pʋg-kãng soabã a sẽn na n dogã, yɩɩ yʋngo. A sẽn dog n sa, a kell n dɩka biigã n ning saase pʋga. Beoog sẽn vẽege, pagbã yã-a lame n sʋk-a t’a biig bee yae? Pagbã sẽn sʋk-a wã, a tall-b lame n kẽng n tɩ wilg-b biigã. La zu-bʋko, biigã paam n maana kaalem. Rẽ n kɩt t’a Bilɛɛs Sãndwiid rãmb sẽn wa n na n lugl ADIG sullã b gesame tɩ Namendtẽng soolmã, sula beeme n get: karen-moore, weoog koglgo, koobo,  gʋʋlgo… la sull sẽn get: nen-yilinsã, pelen-yɩgsã, bɩ kĩsinkĩirã bãad rãmb ye.

A Bilɛɛs Sãndwiid wilga woto:« ninsaal buudã fãa mi a rogem, la a ka mi a sẽn na n baas toto ye. Nen-yiling bãada, a zakã pʋgẽ menga, b ka get-a ye. Ned sẽn wa n sɩng bãagã bẽebo, a zakã rãmb sɩngda a pʋgb bilf-bilfu, n wa tɩ raag-a n bas t’a yi n be vɩʋʋgẽ. A sã n yi n be yɩnga, b rengd n pʋgd-a lame, n wat n tolg n bas-a t’a lebg a yembre. B sã n bas-a t’a lebg a yembre, saasã pãbd-a lame, waoodã kẽed-a lame… Kẽer me yõkda b bãad n sẽb ne sɛnd dãmb n zĩnig zak pʋga, bɩ vɩʋʋgẽ t’a be be a yembre. Pagã biig sẽn k iwã a yĩn-sidgã kẽe tõndo. Tõnd sẽn lugl d sullã tõnd kell n zãa pagã,  t’a zĩnd ne tõnd n wa yik a yõor bãag n maan kaalem, tɩ ADIG ne Buls Meeri wã naag taab n bao roog n kõ-a. D ka tol n bãng a ba-yirã zĩig ye. Tõnd sẽn tʋmd tʋʋmd ningã, a taab ka waoog Burkĩna Faso wen-vɩɩs a naasã pʋgẽ ye. Sula sẽn yãk yam n tɩbsd nen-yilinsã bãad rãmba, la b pẽnegd-ba, n sagend-b n gãnegd b yamã, b sõor nan ka waoog ye. Nen-yilinsã bãag bẽedb sʋka, nina bãag ka sek a na be vɩʋʋgẽ n saagd n nogd kʋds rãmb ye. Nina bãag yaa nebã n lak b mens n bas-a t’a wa kẽnd a yembr n ka tar sõsd-n-taaga, n kɩt t’a mag-mag a yembre, n wa lebg yɩng neda. Bãad ninga, b bas-a-la a mengã sẽn dog zak ningã pʋgẽ, n bas-a a sakẽ wã, n bas-a b tẽngã pʋgẽ, t’a kẽnd a yembre, t’a zoobdã wa lebgd wʋsgo, t’a nu-yẽesã wa lebgd wogd-wogdo, t’a fuudã wa kiidẽ, t’a wa sɩng n kẽnd zaala… Sãnda bõosda nebã sõngre, tɩ b rigd-b tɩ b ra pẽneg-b ye. Neb me n be, ba b nedã sẽn wa n lebg a soaba, b bee ne-a wĩndg la yʋngo».

 ADIG sẽn paam a rogem sebrã 2006 b gilga Buls komindã pʋga, n sõs nene-yilingã bãad rãmba, n paam tɩ b yamã gãande, tɩ b tall-b n tɩ bao rɩɩb n kõ-ba, n bao logtoɛɛmba, la sikolog rãmb tɩ b sõsd ne-ba. Yʋʋm-sar kiuug 2019 mam kẽnga Buls n tɩ maan b Repogtaase. RTB kiba-kɩtb me ra bee be. Badaare, nen-yiling bãad a yembr n dɩk koɛɛg a taabã yʋʋr yĩnga. A gomame t’a goamã tik nebã wʋsgo. Bãadã yeelame:« tõnd pʋʋsda Asosɛsẽo wã bark wʋsgo. Wẽnd la bãmb yĩnga, tõnd leb n paamame n naag d taab rũndã n dɩ la d yũ. Tõnd paama koom n so, d paama fu-paala, b põesa tõnd zutã, b segla rɩɩb tɩ d naag n dɩ. Rũndã tɛka, tõnd ne bãmb lebga bũmb a yembre. Tõnd sã n da paamdẽ woto pĩnda, tõeeme tɩ d ra ka beẽ nen-kãngã ye ». ADIG tɩbsda : nen-yilinsã bãase, nn paas kĩsikĩirã la pelen-yɩgsã bãad rãmba. Nin-wẽnsã tʋʋm-yood sẽn wa n kẽ sʋk n paasã, pelen-yɩgsã bãad rãmb sõor paasdaa ADIG tʋʋma zĩigẽ daar fãa. Tɩ bala, neb n gãens kũum, neb la b yals b roagdb taoor n kʋ-ba, neb me n yã kũum b sẽn zɩ n yã, VDP rãmb sãnda gãnga kũ-rãmba, tɩ b pelensã yɩke, tɩ b fãa zutã ka le ket b zĩigẽ ye. Bãmb rãmbã, ADIG baooda sikoloog rãmb tɩ b sõsd ne-ba.

 ADIG sẽn tɩbs neb tɩ b sãoog n tara laafɩ, n ka le bẽed nen-yilingã bãas sõor taa neb kobessi. Pagb kẽer sãoogame n paam sɩdb n kẽ kãadem. Rap sãnda sãoogame n paam pagb n n dogd b kamba. Pag a yembrã yii Po, n da wa be Buls t’a roagdbã ka mi a zĩig ye. A zĩnda Buls yʋʋm piiga, t’a roagdbã meng wa zẽk tɩ b na n maan a kʋʋr t’a kiime. B tɩbsa pʋg-kãng t’a sãooge, n maan mooneg koɛɛg t’a nebã bãng n kẽng Buls n tɩ tall-a n kuli. Sullã taoor soab a Bilɛɛs Sãndwiid wilgame tɩ nina bãag ka kẽng taoor boto ye. Bãad ning ya a ka paam teelgo, nina me ba b sẽn teel-a toto, a bãagã ka tõe n sa ye.  La baasgo, a sã n paamd koglgo, a yamã gãandedame t’a ka tõog n maan ned wẽng ye. Mam sẽn wa n maand vaeesgã ne-b n na n paam n gʋls kibarã, bãad rãmb b sẽn tɩbs tɩ sa, tɩ b rãmb kul b zagsẽ, wal b roagdb wa reeg-b n kuli, b sõorã ra taa bãmb pissi n dogle.

Tʋʋlg kiuug rasem 13 yʋʋm 2026 ADIG taoor soab a Bilɛɛs Sãndwiid yiisa vidiyo ne foto a paas Feesbukã zugu. Vidiyo wã pʋga, yaa nen-yiling bãad a ye sẽn da be Buls komindã pʋga. Bãadã ra bee Buls hal  2000 yʋʋmdã n kẽnd n tebd a nus a yiibã n maand-b wa a sõoda a lʋgã la a bõosdẽ:«  madaam! Madaam m wa reege ».

Nedã meng ra ka tol n mi a yʋʋre, a ka mi a sẽn yitẽ, a ka mi a buud yʋʋre, ned ba a ye me ka mi a yʋʋre. Buls komindã neb ra kʋmbame n dɩk a bõosgã gomd n kell n boond-a t’a Madaam. Buls nebã fãa ra mi-a-la ne yʋ-kãnga.

Asosɛsẽo ADIG sõngr yĩnga, nedã bãng a nenga, a mi a sẽn yitẽ, n mi a yʋʋr la a sondre. A sẽn bãng a nengã, a wa n yika raar a yembr n dɩk Pʋytẽng sorã t’a na n kulame. A sẽn dɩk sorã b togsa a Bilɛɛs t’a zomb n tɩ paam-a n gõoge. Rẽ la a yeel yã t’a yʋʋr ya a Sorgo, Tʋʋsma, la a yita Tẽnkʋdgo Toepãarẽ, la a rat n kula a buudẽ.

Yaa rẽ tɩ ADIG taoor soab a Bilɛɛs Sãnwiid ra yiis kibarã n kotẽ tɩ ned ning fãa sẽn yã-a, n mi a tẽngã, bɩ a roagda, wall a buudã neda, bɩ a bool-a a limo-kãensã :70361097/79554320 wall 5386127 tɩ b paam t’a nebã bãng a zĩiga. La hal ne tʋʋl-nif kiuugã pʋgẽ mam sẽn wa n gʋlsd kibarã, t’a Sorgo Tʋʋsem ra keta ADIG rãmb nengẽ.

Tʋʋlg kiuug rasem 26 yʋʋm 2026 soabã, ADIG rãmb leb n tʋma b sẽn minim n maandẽ. Badaare,  yaa neb 27 sẽn bẽed zutã l nen-yilinsã bãase. B sʋka, pagb ya a 5 tɩ rap ya bãmb 22. La b fãa ra bee Buls komindã sɛktɛɛr a 5 wã pʋgẽ. Asosɛsõ ADIG taoor rãmb kẽngame n tɩ tall-b n ta b tʋʋmdã zĩigẽ, n tɩ  põens b zutã, n wõrs b nu-yẽesã la b na-yẽesã, n bao koom n so-ba, n leb n yelg-b fu-paala, la b segl rɩɩb n kõ-ba.

Neb sẽn yãag ADIG tɩ b tõog n maan tʋʋmdã yaa Lahagi Sʋʋdre Karim, sẽn be Bulsa, la  Buls sɛgtɛɛt 4 Katolik karen-saamb a Ãndre Sawadgo, ne mise Yɩlenga Kiristof sẽn be Buls sɛgtɛɛr 1. Tʋʋmdã sẽn wa n satẽ, bãadã rãmbã sũur yɩɩ noog hal tɩ b pẽge.

ADIG yaa Namendtẽng porvẽesã sulli, la rũnda-rũnda, a yalgdame n kẽed babs a taab wala : Kʋlse, Nakambe, la  Wubr soolmã. B tara tʋmd-n-taar ne: Tugri,  Kaya, Kugpɛɛla, Zorgo, la Tẽnkʋgo.  ADIG sẽn lugla a sullã t’a ba-yãkdg yaa SAPAD taoor soab a Sɩdnooma Yisɛka KABOORE, ket n yaa yẽ. B sã n mi n tar b ra-kasensã tʋʋmde, b yãkda Okomisɛɛr bɩ Miniistɛɛr dãmbã tɩ b yɩ tʋʋmdã zu-raoog taoor dãmba. Miniistɛɛr ning sẽn get nin-buiidã sõng taaba, la zagsã, ne Bʋ-kaoorã Miniistɛɛre, ne Miniistɛɛr ning sẽn get laafɩ wã, la tʋm-n-kõ nin-buiidã Miniistɛɛr yãagd-b-la b tʋʋmdã pʋgẽ. Yʋʋm 2020 Miniistɛɛr ning sẽn get nin-buiidã sõng taaba, la zagsã kõ a Bilɛɛs Sãndwiid waoor kũuni, a tʋʋm-sõngã yĩnga. ADIG sullã sẽn tõog tɩ bãad rãmb sẽn da ka mi b nens bãng nensã, tɩ sãndã sãoog n lebg n kẽ kãadem n dogd kambã, tɩ kẽer vʋɩɩm lebg n ya noogã, wilgdame tɩ naoor wʋsgo, yaa nebã sẽn mi n zãagd b mens ne ne-bã, n wat kɩt tɩ nina kẽ moogo. Nin-buiidã sã n pẽnegd ne-ba, n sõsd ne-ba, la b gomd ne-ba, b yamã wat n gãandame tɩ bãmb me bãng tɩ ka yĩm b yell ye.

Mam kota ned buud fãa sẽn tõe n yãag ADIG ne ligdi, bãngre, la teelg buud toor-toor sã n be, bɩ a teel-ba, tɩ b reega tõnd fãa maoor n maoodẽ. Wẽnd na kell n kõ ADIG taoor rãmbã, paas la b sõng-b tɩ b kẽng taoor ne b tʋʋmdã.

A Pẽgdwẽnde Erik Zĩnaaba

Tʋʋl-nif kiuug yʋʋm 2026 soabã, mam makame n na n dɩk tẽngã pʋgẽ sagdã sẽn tõe n wa wa ne zu-loees kẽer wala bãase, la yolgemdã kaalem wɛɛngẽ Waogdg tẽngã pʋgẽ. Mam dɩk-a lame, n na n gome, sẽn na yɩl tɩ d naag taab n bao a tɩɩm.

Waogdg Kosood sakã pʋgẽ, sẽn kẽed ne: ko-põaasã, la lozĩnd dãmbã ne seese rãmbã wata ne yolgemd kaalem la rẽgd sakã pʋga. Lozĩnd-dãmbã zĩisẽ, zĩis kẽermi n tẽgena ne ko-põaasa, tɩ b yũugã ya wʋsgo. Yaa ko-põaas wala gãndã lozĩndẽ ko-rẽgdã, gor-biisã b sẽn wẽkd n yãkd kaamã, Bastoaarẽ wã nebã sẽn kʋʋd rũmsã n paas ne neb a taab me sẽn mi n yi vɩʋʋgẽ, n solgd n kʋʋd rũmsã yaare, tɩ ka tũud sor ye. Ko-põaas nins sẽn yit be wã tẽgendame n paasdẽ, tɩ yolgemdã kaalem tar pãng paasgo.

Lozĩnd dãmbã tʋm-tʋmdb kẽer lobda kagtõ rãmbã bogdã pʋsẽ, tɩ sebgã rɩkd-b n buiid sags nins sẽn pẽ-bã nin-buiidu. Sɩma wã lozĩnd dãmba, la neoodã wã lozĩnd dãmb mi n tara yũug la wubsg n kẽed nin-buiidã, tɩ rẽ fãa ya zu-loɛɛg n namsd-ba. Noonloti rãmbã pʋsẽ, neb kẽer vaagd b rot pʋs te-kʋdã, n tũnugd sa-koomã n zamd bogdã pʋse. Noonloti rãmbẽ wã pagb kẽer pɛgda laase, la fut n yit n lobd ko-rẽgdã soayã pʋse. Rẽ kɩtame tɩ soaya mi n tugd bogdo, tɩ kẽna lebgd toog ne nin-buiidã.

Sasa ning me mi n yaa “bʋʋm yãang bʋʋm daaga”. Rẽ kɩtame tɩ nin-buiidã tõe n tara bʋʋm. Tɩ bala, sagd lobr zĩis ka waoog Waogdg tẽngã pʋgẽ ye. Kamaan-maasã wakate, nina raada kamaand sorã noor n wãbe, n zãad kamaan-daoogã t’a lobr zĩig kae sorã noor ye. Neb kẽer me raada koom n yũ, n ka mi b sẽn na n lob saase wã zĩig ning ye. Waogdg tẽngã pʋgẽ, yaa ra-kasengã sẽne la b maan sagd ningr zĩis n dʋʋg soaya noore. Zĩis a taabã sagd zĩis ka waoog ye. Rẽ kɩtame tɩ neb kẽer kell n lobd saase rãmbã b sẽn paamẽ.

M sã n gomd sagdã lobr zĩis sẽn pa waoogã, yaa zĩis nins Meeri rãmbã taoor dãmb sẽn yãk n kõ nin-buiidã tɩ b lobd b sagdã. Sagd lobr zĩig sã n be me, b kalemda sagdã taaba, t’a mi n põog n ya yũugu. Meeri rãmbã taoor dãmb ra sɛgd n yãka zĩis toore, tɩ zĩ-kãens kell n yaẽ bõn-põaasã lobr zĩiga, tɩ bõn-koeems wala te-sũud rãmbã me lobr zĩig ra beẽ toore.

La nan ka boto ye. Tɩ bala, mobila wã sã n mi n wʋk Waogdg ra-kasengã noor sagd n wa Tuudbweoog sagdã lobr zĩigẽ, ned sã n getẽ, a mikdame tɩ yaa bõn-põaasa, la bõn-koeems sẽn kalem taaba, tɩ fãa ya gida, t’a yũugã reeg zĩigã n yãmbe.

Yʋʋm 2020 tõnd kẽnga Tuudbweoog sagdã zakẽ n tɩ maana Repogtaase. A wakatẽ wã rẽ tɩ ra yaa Senegall biig a ye, n da wa n be be n daad te-sũud rãmbã, tɩ neb a taab me reegd n werd n naand: so rãmba, paave rãmba, goeelse, la teed a taaba. Pagb lagem-n-taar sull n da be be, n tũusd te-koeems wala: bidu rãmba, sũudã teedo, waasdã la kutã tɩ b raad n lebgd n naand te-paala.

Yʋʋm 2022 n tãag 2025 neb a taab me wa n kẽe te-kʋdã tũusg wala: saase rãmba, te-sũud rãmba, waasdo, kutu, zũudu… Yʋʋm nins mam sõdgã pʋgẽ, Tuudbweoog sagdã lobr zak pʋga, Lekoll karen-biisi, kom-bãoonego, pagba, la sagdã zak pʋg taoor dãmbã sẽn dɩk-b rãmb tʋʋm tɩ b be zak pʋg n gũudẽ wã, bãmb ne pʋg-yãans nus nins sẽn pa tat b poorã, la b ka tar tɛɛndbã, b fãa wa n kẽe sagdã tũusd n koosdẽ. Hal t’a ra lebg b nug tʋʋmde. Yʋʋm 2022 ne 2023 sagdã tũusd-b sõor wa n paasame.

Tɩ bala, nin-wẽnsã wa n yikame n digd nebã Burkĩna Faso tẽn-kɩrensã pʋse, tɩ b yikd n basd b tẽnsã, la b kẽed Waogdgo, galentẽngã pʋga, n dat n kogl b yõore. Nin-wẽnsã sẽn yik b rãmbã sẽn wa n wa wã kẽer ra ka mi b sẽn na n maan a soab n paam rɩɩb sẽn na lob b noorẽ ye. Tɩ bala, b wa n kẽe tẽngã pʋgẽ woto bal tɩ gosneer ka bãng b tiir n sõd-b n naag neb nins sẽn paam zu-loeesã sʋk ye. B sẽn wa wã, neb nins sẽn mi yãnd la b ka minim bõosgã, bãmb fãa ra kẽeda sagdã la te-kʋdã tũusd n koosdẽ pʋga. Waogdg sagdã lobr zak sẽn be Tuudbweoogã, pagbã la kambã ra tusda taab n wẽdgd n wʋkd saase rãmbã. Tɩ pagb kẽer kẽnd tẽngã pʋg n wʋkd saase rãmbã, la b tũusd teed a taab b sẽn daad n lebg n naand te-paala, n koosdẽ.

Saase rãmbã kɩlo ra yaa wakɩr pissi la nu wakat kãnga. Yʋʋm 2025 yʋʋmdã b wa n paga sagdã zak Tuudbweoogo, tɩ b ka le tõe n paam zakã pʋg n ta ye. B sẽn pag sagdã zakã neb kẽer kẽndame masã n pẽnegd sagdã zak lalg wĩndg sẽn yitẽ babgã n lobd sagdã. La sẽn ya vɩʋʋgẽ wã b yõogd-a-la bugum wakat fãa t’a bug-zõosã me tõe n wa wa ne bãase.

Pʋg-yãang a Sawadgo Gĩngr kõta kaset bũmb ning sẽn kẽes bãmb saase rãmb wʋkr pʋga:” mam ra bee tõnd tẽngã Kʋgsablgo “Sɩraba” soolmã pʋga. La yaa Kɩrgẽ n da get tõnd yelle. Yaa sẽoogã sẽn wa n kẽ tɩ tõnd bʋd tɩ pʋʋdã yõg tɩ d sɩng koobo, la nin-wẽnsã wa n wẽ tõnd kõ-m-mengã rãmba “VDP”. B sẽn wa n wẽ-bã, tẽngã zãng fãa kaoogame n yiki, tɩ lebg ned fãa kẽng a roagdb sẽn beẽ n tɩ zĩnd n paam n põsg a yõore. Mam yika ne m bi-pugl a yembr biiga, a Yɩma Samira n babs m biig a ye sẽn da be Waogdg n me sembdẽ.

Mam sẽn wa n ta ka wã, m ka mi tʋʋmd a to n paas koob la gʋʋlg ye. D yikrã me sẽn wa n lebg ne pãngã, d wʋka d rũms la d kood n fabe. Mam sẽn wa n ta ka wã, m wʋmame tɩ nebã segda taab a Fadull n wʋkd saase rãmbã n koosdẽ. Mam sẽn da be m tẽngẽ wã m ka minim bõosg ye. Bõosg yaa bũmb sẽn faagd ninsaal zɩɩre. A ka sõma tõnd sẽn dog-n-mikã pʋgẽ ye. M biigã me sẽn sembdã, mam sã n dɩk fãa n bas ne-a t’a na n tõogame, la m yaool n ne a tõogã tɛka, ka na n wa zems ye. Yaa rẽ tɩ mam bas t’a loog a tʋʋmdã zĩigẽ, tɩ mam maan yam n pẽneg m pʋg-yãan-taag a ye sẽn wʋkd saase rãmbã, tɩ d tũud taab n kẽnda. D ra wʋkdame n tigimd ne Mustikɛɛr dãmb tɩ neb a taab wat n zuuda, tɩ kambã me wat n ningd-a bugum. Maam ne m yagengã sẽn kẽnd n wʋkd saase rãmba, la tũusd: kutã, waasdã, zũudã, la te-sũud rãmbã n koosdẽ wã, mam wa n ka le teeg m biigã t’a kõ-m gʋʋr bɩ tabr ligd ye.

Pipi wã tõnd ra koosda saase wã kɩlo fãa wakɩr pissi la a nu. Te-sũud rãmbã kɩlo wakɩr piig la a nu. Waasdã ne zũudã kɩlo yaa wakɩr pis-wɛ. Koomã bidu rãmb yaa bãmb b naas wakɩr a nu. Sasa ninga m tõe n koosa saase rãmbã la teed a taabã tus a nu, bɩ a yoobe, wal a naase. Kiuug pʋgẽ m tõe n koosa naoor a yiib bɩ vugri. Bee ne sagdã sẽn wa toto kiuugã pʋgẽ.

Tõnd waoongã wakate, rẽ tɩ yaa sẽoogo. Mam sẽn sɩng sagdã gaasg ne sẽoogã, yʋʋmdã ne a na n yi, tɩ mam tõe n sõda tus koabg la zaka. Pipi wã õnd sã n da wʋk saase rãmbã, raadã reegdame n geel ned fãa ligd n gʋls sebr n kɩs-a, la a kẽng n tɩ koose, n yaool n wa yao. Mam wʋka saase rãmbã n koose, tɩ wa wẽnd tẽngã bʋkda bilf-bilfu, tɩ mam yãag m yagengã sẽn da tũ maam n wa wã n tɩ kɩs a ba rãmb tɩ b kuls-a a sɩda. Saase rãmbã ligd pʋg la mam yãk n da a kulbã teedo, n yãag-a n tɩ kɩse. Mam sẽn kulã m mikame tɩ neb wʋsg ra lebgame n lebd b tẽnsẽ. Rẽ kɩtame tɩ mam kell n zĩnd Buls soolem tẽn-bil a ye b sẽn boond tɩ Takensẽndẽ n ko. Mam koo be. Yʋʋmdã sẽn wa n yit paalem, nin-wẽnsã le wa n yikame n digd nebã Daorg la Bok soolmã tɩ mam lebg n le wa m biigã nengẽ. Mam sẽn wa wã m le sɩnga saase rãmbã wʋkd n koosdẽ.

Mas-masa wã b sã n da saase rãmbã, b kell n yaooda ligdã zĩig pʋgẽ. Te-sũud rãmbã kɩlo sẽn da ya piig la a nu wã, a lebga pissi. Saase rãmbã kɩlo sẽn da ya pissi la a nu wã, yẽ me lebga pissi la a nii. Kutã kɩlo ket n yaa wakɩr pis-tã.

 La tẽngã taoor rãmb sẽn pag a Fadullã, saase rãmbã paoong lebga toogo. Tõnd yakda tõdbeoog noaag kelem-vuk n tũnugd sorã noore, la nebã sõasg zĩigẽ n wʋkd b sẽn yũ koomã ne yʋngã n lob saase rãmbã. Mam sã n yak n kẽng me, m tɩgd n mikme tɩ neb a taab n zoe be be n wʋkdẽ.

La mam me wʋkdame, m mi n tõe n paama tusri, bɩ tus a yiibu. Saase rãmbã sẽ, a sõngda tõnd wʋsgo. Bũmb zãnga, nin-wẽnsã sẽn yik b rãmb tɩ bas b tẽnsã. Tõnd sẽn segd taab sagdã gaasg zĩigẽ wã yaa: Pɩsla, Kõngũsi, Tugri, Kaya, Yaadgtẽnga, Kelbo, Gibo, la Arbĩnda neba. Tõnd sẽn paam taab be wã, d lebga zak a yembr kamba”.

A Wedraoog Alimata, tɩ b boond t’a Pʋgyãan-yãama:” mam bee Waogdg ka. Mam ba-yirã yaa Koasenga. Mam kul m sɩdã, n doga kamb a yiibu, tɩ rao-kãng maana kaalem. A sẽn kae wã, b rɩk maam n kõ ned a to, tɩ mam dog yẽ me kamb a yiibu, t’a bas n kaẽ. Yẽ sẽn kae wã ned ba a ye ka sak n deeg maam b buudã pʋg ye. Tɩ mam yi n tɩ rɩk raoa. Mam zĩnda rao-kãng nengẽ tɩ mam bi-rib-kasengã wa tall maam n wa Waogdg ka. Mam sẽn wa ka wã, m da sɩnga yãamd koosgo, n paamd ligd bilf-bilf n loet m bãongo. Mam sẽn koosd yãamdã logtoɛɛmbã wa n yeelame tɩ b ra yũnug kambã yãamd ye. Mam bi-pugl a ye me n da yi Kodivoaar ne a kom-pugl a yiib n wa paas tõnd tɩ d be zakã pʋga. B sẽn yeel tɩ b ra yũnug kamb yãama wã, m na n maana wãna? Yaa rẽ tɩ mam kẽ saase rãmbã la sagdã gaasgo. M gaasda sagdã bilf-bilfu, la m wat n yiisd yãamdã n koosdẽ. Saase rãmbã la te-sũud rãmbã la kutã la waasdã koosg yẽ, d ka le tõe n bas-a ye. Masã rẽnda tẽngã taoor rãmb ges b sẽn tõe n maan toto n sõng-d d laafɩ wã wɛɛngẽ. Wakat ninga, tõnd mi n yãa wala rɩɩb ning sẽn sãam tɩ b wa lobe, tɩ d wʋk n pʋɩ taab n kul n tɩ rɩ. D miime tɩ rẽ fãa tõe n wa yɩɩ bãase, la “naaf yeelame t’a ka tar noor ne a yõor wĩir ye”. Tõnd kotame bal tɩ tẽngã taoor rãmb sã n tõe n sõnga d laafɩ wã wɛɛngẽ bɩ b sõng-do, tɩ d ka le tõe n bas sagdã gaasg ye”.

Neb sẽn mam sõs ne sagdã gaasg wɛɛngẽ yaa waoogame, la pʋg-yãansã a yiibã sẽn togs zu-loees nins sẽn kẽes bãmb tʋʋmdã pʋgẽ wã, a kẽesa maam waoodo. Waogdg tẽngã pʋga, pagb kẽer zombda kut wiidi n kẽnd zama wã sʋk n wʋkd saase rãmbã la te-sũud rãmbã, n lebgd zaabrzaabr n wẽdgd mobila wã la montɛyã sʋk n kuusẽ. Wẽdg taabã pʋgẽ, b tõe n fãoo pag ning t’a paamsãmpogdo.

 Saase rãmbã, te-sũud rãmbã, waasdã, la zũudã  wʋkr poore, pagb nins sẽn yẽesd rotã la tʋʋm-noya rãmb me kẽe Ẽmpirmat rãmbã Ãnkr dãmb koosgo. Pagb kẽer pãbda Ãnkr dãmbã n wãad n yãkd waasdã sẽn be-b pʋsẽ wã n koosdẽ. Pagbã wʋkda Ãnkr dãmbã n lebgd n koosd ne neb a taaba, tɩ b raadẽ, n lebgd n suiid Ãnkre. Ra n lebg sui wã, a yaa bũmb sẽn tar wubsg la yũugu, n mi n kẽed nebã. La sagdã gasg yell yaa põk-m-la-f-ra-sɩɩs-ma. Tɩ bala, saasse rãmbã pagbã la kambã sẽn wʋkd n koosd n paamd ligdã bilf-bilfã, a sõngda tẽngã zãadb tɩ b zabd ne bõn-sũud rãmbã sẽn tabend tẽn-gãongã tɩ sa-koomã ka leb n tõe n fõog n kẽ tẽngrã. A wʋkrã leb n sõngda tẽn-gãonã t’a lebgd n vʋʋgdẽ. B sẽn wʋkd te-sũud rãmbã la saase rãmbã n lebgd n naand te-paalã, rẽ me sõngda tẽngã t’a metẽ la a yidgd n kẽnd taoore. A sõngda kom-bɩɩb la pagb tɩ b paamd tʋʋma. Nebã sẽn paam n minim te-sũud rãmbã la sagdã ligd rɩɩb n sa wã, yɩl tɩ b bas-a na n yɩɩ toogo.

Rẽ wã, mam kotame tɩ gosneer ges b sẽn na n dɩk na-kẽnda ninsi, n ges neb nins sẽn dɩk saase rãmbã la sagdã gaas n maan b tʋʋmdã, b ges b rãmbã laafɩ wã yelle. Bala, sagdã zĩigẽ rẽgdã buud toor-toor yaa wʋsgo. Sagdã sẽn kalemd taabã, sagd fãa tara a rẽgdo, tɩ rẽgd fãa me tara a bãaga. Rẽ kɩtame tɩ saase rãmbã la te-sũudã gaasd-b tõe n wa lʋɩ bãaga, tɩ ned ba a ye ka mi bãagã yʋʋr ye.

Logtoɛɛmbã wilgame weoogã bãag tũuda rũm-wãbdsã n yõgd nebã. Weoogã bãag bil tõe n tũu rũm-wãbdsã n yõk ninsaal buud fãa. B togsame tɩ rũm-wãbdsã zãada bãagã bila. Bãagã bil yãgr yita rũngã mengẽ. Tɩ rũngã yaool n nong zĩis nins koom sẽn be wã, wala zĩis nins sẽn pid ne ko-rẽgdo, la zĩis sẽn midgd ne maasr n dɩga. Tɩ yaool n yaa ko-rẽgdã pʋs la rũm-wãbdsã lobd b gɛla, n wekd koomã zugu. Wã fãa yĩng kɩtame tɩ mam tags weoogã bãaga, la bãas a taab sẽn tõe n wa tũ ne sagdã n wa ne bãase. Yaa rẽ tɩ mam rat  tɩ b rɩk neb nins sẽn tʋmd a pʋgẽ n dɩtẽ wã vʋɩɩm koglg yell n ning sʋka. Mam pẽnega ned ning sẽn be Tuudbweoog n daad saase rãmbã n lebgd n koosdẽ wã la m ka mik-a  a tʋʋmdã zĩigẽ ye. M makame n na n sõs ne a tʋʋmdã kamb la bãmb me ka sak n gom ye.

A Pẽgdwẽnde Erik Zĩnaaba

“Maam la Elhagi Madi Sakãnde, sẽn ya komersã. Yaa sɩda, mam sɩd kẽnga perzidã a Damiba nengẽ 2023 wã. Mam kẽnga b nengẽ. Mam sẽn kẽngã, d sɩd sõsame. D sẽn sõsã, n na n leb deezɛma 2025 pʋga. Mam sẽn leb deezɛmã, a yeelame tɩ yẽ rat n kosa maam, bala, bãmb rat n maana naam wẽ-n-dɩke. Bala, yẽ sẽn be mas-masã ka wã, yaa naamã yell bal n pak yẽnda. Yẽ rat n le waa naamẽ wã. La yẽ na n kosa maam, tɩ d sã n ta yiri, bɩ d ges d sẽn tõe n sõng-a bũmb ninga, bɩ tõnd ges n sõng-a. Yaa sɩda mam sẽn sɩd wa wã, mam bʋʋga a Elhagi Wẽem-m-menga Ali. Mam sẽn bʋʋg yẽnda wã, yẽ yaa komersã n be Zɩnyãre. Yẽ yeela maam, tɩ sã n ya woto yẽ tara a yagenga. A yʋʋrã la a Saalfo. Yẽ sẽn tar-a wã, a bee ne naabã. Yẽ me ra wa n gomdame tɩ bãmb me rag n pirpaardame. La bãmb sã n paam perzidã Damiba nengẽ wã n paase, tʋʋmdã na n yɩɩ sõma. Tɩ Elhagi Wẽem-m-menga, na n sɩd rɩk limorã n na n kõ-a, t’a na n bool maam. A sẽn sɩd bool tɩ tõnd seg taabã. Tõnd seg taabã, a togsa woto. A yeelame, tɩ yẽ yaa pere. Tɩ m yeel-a õmbão! Fo sã n ya pere, bɩ f bas tɩ m bool perzidã Damiba tɩ y sã n paam taaba, rẽ yaa yãmb sodaas ne taaba, yãmb n mi yãmb sẽn na n sõs bũmb ninga. T’a sɩd yeel maam bal tɩ sã n ya boto bɩ mam bool-a. Tɩ mam sɩd boole. Mam sẽn boolã a Damiba sɩd rɩkame. Tɩ mam dɩk n paas-a. Mam sẽn paas-a wã, la a Damiba sʋk-a n gese:” tʋʋmdã pʋga, yaa bõe la fo tõe n maane. Sã n ya ne naam wẽ-n-dɩkã pʋga? Yaa tʋʋm-bʋg fo tõe? La f ra wa togs yell ninga fo sẽn ka tõe ye. Fo sã n togs yell ninga fo sẽn ka tõe, tɩ yellã wa ka zemse, yaa bũmb sẽn ka sõma”. A Saalf yeelame tɩ yẽ sẽn tõe bũmb ninga, yaa naabã meng wẽ-n-yãk zugu, la yẽ tõe. Wẽ naabã menga, n yãk zug la yẽ tõe. Sã n ka rẽnda, sẽn kellã fãa, yẽ ka gomd ye, la naabã meng taoorã, yẽ bee ne naabã raar fãa, ae! Yẽ tõee yel-kãnga. Sẽn leb n le paase, a Saalf sẽn leb n le gom wẽebã pʋga. A leb n yeelame tɩ Waga deemillã, nanambsã tara zĩig n segd taaba, yẽ tõe n ninga gerenaad rãmb be fãa tɩ sote, n kʋ neb wʋsgo. Yẽ sẽn tõe wã, yaa woto. T’a na n le lebg masã, tɩ b na n bool perzidã Damiba, tɩ b na n paam taaba, a yiib-n-soab sõasga. Yiib-n-soab sõasgã, rẽ tɩ mam me sẽn sɩd wa wã, n paam-a n segã, mam me ra tara rãndvu Kodivoaare, n sãag n kẽng be, n tɩ reeg ligdi, sẽn ta wa milyão pisopoe. Milyão pisopoe. Mam deeg ligdã n wa. Mam sẽn deeg ligdã n sɩd wa wã. Perzidã Damiba sɩd boola maam n na n sõse. Tɩ ad pagb a yiibu, n paas ne raoa, n na n wa reeg ligdã. La yẽ kõ-b-la rãndvu wã Tesɛɛr gaare. Mam tʋm ned tɩ kẽnge, bɩ mam meng yik n kẽng m toore. Tɩ mam sã n ta bala, pagbã na n zẽka b nusi. Tɩ b zaoo Eskutɛɛr dãmba. Mam sẽn sɩd ta wã, pag a ye n yɩ pipi, kote goosã n zẽk a nugu. A sẽn yã mam sẽn yasẽ n gẽesdẽ wã, tɩ mam kẽng n tɩ ta n kɩs-a, la mam ka gom ne-a ye. Yiib-n-soab pagã me, mam leb n nee yẽ me sẽ yase, n zẽk a nug woto. Tɩ mam leb n kẽnge, n tɩ ta n kɩs-a. Rẽnd masã, kella rao wã. Tɩ mam yeel-a tɩ mam ka ne rao wã wɛ. T’a yet tɩ mam gese, tɩ m na n yãa rao sẽn dell mobillã, la yaa baase. Yaa peezo baase, la a sẽn wa ne wã dʋblkabĩndi. Mam sɩd ta, mam sẽn ta wã la a sẽn zẽk a nug woto, n sɩd reeg ligdã. La ligdã bãmb b tãabã fãa sẽn deegã yaa milyão pis-naase. Milyão pis-naas la bãmb b tãabã fãa sẽn deegã. La b sẽn deeg ligdã woto n loogã, mam mengã ka yaas tɩ b loog ye. La b sẽn deeg ligdã tɩ mam na n lebg n wa zĩigẽ wã, n na n wa ges a Wẽem-m-menga Saalf nengẽ wã, d na n maana wãna? Tɩ yẽ ne a Damiba sã n wʋm taaba, ligdã yaa wãn la a na n kɩse. Zĩ-kãng masã, tõnd sẽn nan zĩẽ tɩ b nan bool taab n na n sɩng goama, la yõgdbã sẽn kell n wa ta. B sẽn kell n wa ta n gubg tõndã, ned ba a ye ka le yaase, n dɩk a fuug ye. Kell n yaa loogr bala. La nan nand t’a wa ne mobillã menga, bugraad n be mobillẽ wã. Saalfã soaba. A Wẽm-m-menga yagengã. Bugraadã sẽn be mobillã pʋgã, la a yet tɩ mam wa yi n gese, tɩ mam yet tɩ ayo! Mam sã n yi n ges me ka tar yõod ye. Bala, mam ka sodaaga, m na n yi n gesa bugraad n maan m bõe! Tɩ yaa kaset yĩng la yẽ ra gomda, rẽnd a gom-kãng sẽn wa wã bala, la bãmbã me sẽn kell n wa wã. N wa ta, b kell n kãag tõnd d yiibã fãa, n sagl mobill yend pʋga, n loog ne tõndo.

La yaa sɩda! Perzidã Yɩbrayɩɩm, tõnd kot-a-la sugri. Tõnd kota yaafa. Ne tʋʋmd ninga tõnd sẽn naag n tʋma, a pa tõnd tʋʋmd ye. Ayo! La ninsaala yaa wɛ n ka ta piig ye, rẽ n wa ne yel-kãnga. Rẽnd rẽ wã tõnd ka na n tõog n gom wʋsgo, tɩ sã n ka sugr bõosg ye. Sẽn leb n le paase, burkĩna bɛɛmbã gilli, tõnd kot-b-la fãa kɛpɩ yaafa, tɩ ninsaal fãa yaa tudgda.

Yaa sɩda, mam da tõrõmpame mam goamã pʋga, n wilg ligdã mam sẽn kɩsã. Boto wã ned fãa sã n kelge, a ka tõe n bãnge, yaa wãna yaa wãn ye. Ligdã, perzidã Damiba yeela maam tɩ m ning kagtõ pʋga, n lebg n maneg n kole, n ãmbale. Rẽnd kagtõ a tãabã, kagtõ a yiibã kagtõ fãa yaa milyão piig la a nu. Kagtõ a yembrã, yẽ soabã yaa milyão piig muka. Sã n ya ne kagtõ rãmbã mam sẽn tall n kẽngã. La a yiibã yaa pagba, yembrã la mam sẽn yeel tɩ yaa rao wã. La rao wã me, ka rao-zaall ye. Rao wã yaa sodaaga. Bãmb b yiibã waa ne Eskutɛɛr dãmba, la rao wãa waa ne baase dʋbkabindi. Rẽnd mam sẽn ta wã, a pʋs n ka gom ne maam mengã ye. A reega ligdã woto la a ges maam bala, tɩ mam kẽng n dɩk m sor n loogdẽ”. Gomdã yaa woto.

CSC taoor soab a Wẽndgũudi Lui Modɛɛs Wedraoogo, ne kʋdemdã, kiba-kɩtbã la gilg-n-ges yel-soalma Miniisr a Pẽgdwẽnde Zɩlbɛɛr Wedraoogo, n paas Miniisr sõangda Amadu Diko sẽn get gʋʋlgã, ne Mali Miniisr a Bukar Dɛne sẽn get koomã ne kʋʋra wã, la Nizɛɛr neb zẽka b naoor n zĩnd zĩigẽ wã.

Miniisr Pẽgdwẽnde Zɩlbɛɛr Wedraoog koeesã pʋgẽ, a pẽga Kapitɛnd Yɩbrayɩɩm Tarwore, a sẽn yãk yam tɩ kiuug pʋgẽ pipi lumus fãa bɩ Manitɛɛr dãmbã  maand waoor n tẽegd Kapitɛnd Toma Sãnkar ne a tũud-n-taas piig la a yiibã b sẽn kʋ wã yelle. A wilgame tɩ waoorã, yaa na-kẽnd-sõngo, sẽn na yɩl tɩ b rɩk yam a pʋgẽ, n tõog n kell n kẽng ne yam nins Kapitɛnd Toma Sãnkar sẽn da gãneg n na n tʋmã. Miniisrã togsame tɩ Memoryall Toma Sãnkara nin-naand-kasengã meeb ligd sẽn kẽ nan ka yɩɩd koabg  piig 10 % pʋgẽ ye, tɩ yaool n yaa Milyaar ka tɛk la b rat n paam n me-a. Yaa rẽ tɩ b rat tɩ ni-buiidã fãa kẽes b  toog tɩ b tõog n baas-a. Miniisr Pẽgdwẽnde Zɩlbɛɛr Wedraoog boonda nin-buiidã tɩ b kɩs b nug bũmb tɩ b tõog n me Memoryall Toma Sãnkarã t’a yɩ wa b sẽn datã.

Miniisrã koees poore, CSC taoor soab a Wẽndgũudi Lui Modɛɛs Wedraoog me rɩka koɛɛga. Yẽ me koeesã pʋgẽ, a kell n pẽg tẽngã zãadb yam yãkrã. A wilgame tɩ b yam yãkrã boonda burkĩn-bi wã la nin-sabls tẽnsã kamb tɩ b mobg taaba, la b naag taab zĩig fãa n zab ne nasaar wẽnsã ne b yam-soaadɩ wã, tɩ Kapitɛnd Toma Sãnkar sẽn da tuk sor ning n dat tɩ b vʋɩɩmd ne burkĩnd la zug zẽkrã tõog n yɩ vẽenega.

A Wẽndengũudi Lui Modɛɛs Wedroog ratame tɩ nin-buiidã kẽes b toog ne b nug bũmb tɩ Memoryall Toma Sãnkara wã, na n sõnga nin-sabls tẽnsã zãadb tɩ b politikã toeem na-kẽndre, n kẽng taoore, ne sɩda, la bʋ-tɩrse, tɩ b zamaanã gãand bãane.

A Pẽgdwẽnde Erik Zĩnaaba

A Pẽgdwẽnde Erik Zĩnaaba

Ladeli sɩnga a tʋʋmdã Waogdgo, Sãnkaryaare. Sãnkaryaar vaeesgã pʋgẽ, b paama neb sẽn da koosd koosem tɩ ka tũud soay n yõge. B sẽn yõg b rãmbã ra koosda: bõn-pusdum, rã-toose, la te-wẽns buud toor-toore. Yõ-koglgã Miniisr a Masmuudu SÃANA wilgame tɩ sodaasã sẽn tʋm tʋʋmd ningã b fãaga neb ka tɛk yõore. Bala, b ka tõe n bãng tɩ tẽng gãand bãanã rãmb na n bee weoogẽ wã n zabd wĩndg la yʋngo, tɩ neb be Waogdg n dɩk zabrã n maan b paoong pukr sor ye. A wilgame tɩ b rãmbã sẽn da koosd teed ninsã sõngda nin-wẽnsã la tẽngã bɛɛb sẽn be weoogẽ wã tɩ b tʋmd b tʋʋm-yookã.

Miniisrã kell n kẽnga taoor n wilg tɩ bõn-pusdmã sẽn pus Laglẽ la Tuudbweoog wakat sẽn loogã yaa bõn-pusd-kãens buudã n yɩ sabaabo. Miniisr SÃANA kõo Ladeli wã sor tɩ b na n maana vaees raas wʋsgo. Sãnkaryaar nengẽ wã, b rɩka raarã tõr n kell n tʋm tʋʋmdã. La bũmb ning sẽn wa ne Sãnkaryaar vaeesgã, yaa sull ning tẽngã zãadb sẽn sigl tɩ b sigind tẽngã sẽn na yɩl tɩ bũmbã fãa tũ sor wala sẽn segd tɩ b boond tɩ Laabalã n da kẽng zĩigẽ wã n na n tɩ yõk tab-wẽngã koaasda, tɩ Sãnkaryaar raag biisã n yik-b tɩ b kõn tʋm b tʋʋmdã, yaa rẽ n wa ne b sigl Ladeli wã. Sãnkaryaar vaeesgã poore, sapaolg kiuug rasem 19 yʋʋm 2025 yaa Bobodɩʋlaso raagã la b vaeesda rãmbã.

A Pẽgdwẽnde Erik Zĩnaaba

a ratame tɩ b ges yʋʋm pissi wã sẽn loogã pugẽ tʋʋma, n bal n gese, b zoe kẽn n taa yae, la b rat n kẽng-a n ta zĩ-bʋgo. A wilgame 2023 tɛka, b kẽng taoor Nimerikã tʋʋm wɛɛngẽ la b segd n modgame n kell n kẽng taoor n paase. Bala, a ratame tɩ ka la yʋʋm a nu sẽn wata, bɩ b mik tɩ yaa wa b sẽn da be a pʋgẽ yʋʋm koabga. A kell n togsame tɩ Burkĩna Faso segd n lʋɩs-a-la taoore, n tõog tɩ ãndũni wã fãa pʋgẽ, bɩ Burkĩna Faso zĩnd sʋka. A wilgame tɩ rũnda-rũnda tʋʋmd ka le tõe n tʋm t’a ka be sʋk ye. B sã n dɩk Nimerikã n kẽes sʋka, a na n sõngame tɩ nin-yend sẽn dɩk neb ka tɛk tʋʋm n tʋmdẽ wã, bɩ rẽ kolg weoogo, t’a leb n kẽesd tẽngã laogo. A na n sõngame tɩ gosneem tʋʋma kẽng taoore. Yaa laafɩ wã wɛɛngẽ, tɩ yaa kaorengã, tɩ yaa yõ-koglgã zĩigẽ, bãmb fãa segdame tɩ b kẽes Nimerikã sʋka, sẽn na yɩl tɩ bũmbã fãa kẽng taoore. A kell n togsame tɩ b ka tõe n zab ne ninsaal yam raabã n tõog t’a ka zĩnd sʋk ye. B sã n dat zab ne-a t’a sa zãnga, rẽndame tɩ b kẽes Nimereikã zĩig fãa. Tɩ bala, tõnd tẽngã tara a tʋʋmde, yaa rẽ n kɩt tɩ gosneem kẽesd a toogo, sẽn na yɩl tɩ Nimerikã tall n tʋm lebg vẽenega. Tʋʋm-noya fãa sã n kẽes-a sʋka, a na n sõngame tɩ b zab ne ninsaal yam daabã. Yaa rẽ tɩ Kapitɛnd Yɩbrayɩɩm TARWOR rat tɩ neb nins sẽn tʋmd a pʋgẽ wã sẽn tar bãngr buud toor-toorã,

bɩ b rɩk-a  kẽes sʋk gosneem tʋʋm-noya pʋgẽ t’a  yaa bũmb sẽn tõe n sõng tɩ bɛ wã sã n na n ling n kẽ n maan sãoong bɩ b gɩbl tao-tao n seg-a t’a ka paam n ta ye. A wilgame tɩ rũndã zugã ned fãa ratame tɩ bũmb sã n yɩ pẽrɩ bɩ a togs tẽng gãand bãanã rãmb zĩig pʋgẽ tɩ b gɩbl tɩ ra sãam ye. Nimerikã fãaga neb ka tɛk yõya. Bala, a sõngdame tɩ b beool n seg nin-wẽnsã tɩ b ka tʋm yook ye. Yaa rẽ tɩ b rat tɩ b kẽes-a karen-dotã pʋse, la zĩig fãa.

A Kiswẽndsɩda Robɛɛr KABOORE

-Pagbã sõor yaa tus-kẽemd a nu 5,6 la zaka.

-Rapã sõor yaa tus-kẽemd a yiib 2,2 la zaka

Yaa rẽ tɩ Oni sagend pagbã tɩ b maan gũusg ne rapã yõy wẽgbo, la b waoog-b sõma, tɩ bala, b sõorã ka yɩɩd tus-kẽemd a yiib la zak ye :

-Rapã sʋka, rap tus-kẽemd a ye n zoe n kẽ kãadem.

-Rap nins sẽn kẽ kãadmã sʋka tus-kʋʋng 130 n be bãens rotẽ.

-Rap milyão 70 n be namsg pʋgẽ, zug kaoolg bãas wɛɛngẽ.

Rẽ wilgdame tɩ yaa rap tus-kẽemd a yembr masã, n wẽnd rap sẽn tõe n wa kẽ kãadem, bãmb tus-kẽemdã pʋgẽ:

– Rap koabg pʋgẽ rap pis-nu 50 % n ka tar tʋʋma

-Rap koabg a tãab 3 % n wẽneg n kẽed ne taab pag ne rao wɛɛngẽ

– Rap koabg a nu 5 % n ya labe rãmba, n ka kẽed kãadem ye

-B koabg pʋgẽ bãmb piig 10 % n ya buud a yembre, bɩ rogem

– Bãmb sʋkã neb pis-tã la a yiib 32 % n zoe n tar yʋʋm 66

Rẽ wã, m tãp sõmse gãd-y rapã kãenkã, la b zã-b ne waoore, tɩ rapã sõor na n paooga ãndũni wã pʋgẽ.

Yẽ n zẽk a naoor n kẽng Maane babg ning b sẽn boond tɩ Kʋlsẽ wã Miniisr Yɩsmayɛll Sõmbi yʋʋr yĩnga, n tɩ kõ sor tɩ b sɩnge. Tɛɛndbã raab  ne b sẽn na n teel b rãmb ne rũmsã, ya b na wags-taab ne rũmsã zãabo, tɩ b tõog n yɩ sõma.

Yaa neb 83590 n paam tɩ b na n teel-b ne : pĩisi, kurkuiimba, la noos tɩ b gʋʋle. Pĩisã ne kurkuiimbã zĩigẽ, ned fãa na n paama  pe-raoogo, la pe-yãans a tã, e b rɩɩb yolg a naase, n paas b tɩbg ligdi. Kurkur-n-daoogo, la kurkur-n-yãans a tã, ne b rɩɩb yolg a nu, la b tɩbs ligdi. Noosã zĩigẽ,  yaa no-raoogo, la no-yãans piiga, ne b rɩɩb teedo, la b koom yũub teedo, n paas b rɩɩb yolg a yoobe, ne b paas b tɩbsg ligdi.

A Pẽgdwẽnde Erik Zĩnaaba

A wilgame tɩ yʋʋù sigr kiuug 2024 b ra kẽnga ne gomdã bʋʋdo, tɩ bʋ-kaoodbã yeel tɩ kaset ka be ye. Sa-sik kiuug rasem 27 yʋʋm 2025 b leba ne gomdã, la vaeesgã sẽn maana, b wa n mikame tɩ bʋ-kaod-bɛd la bʋ-kaod-bãoones n kẽes b nug ninsaal yam daabã wɛɛngẽ, tɩ b ne doand dãmbã ra rat n sãam bʋʋdã tɩ gomdã kell n sa.  La sẽn zĩig sẽn ka zemse, b mikame tɩ neb nins sẽn tɩ togs tɩ b gũus n bãng zãmbã rãmba, b togsa sẽn ya b rãmba. B sẽn togs kibarã kɩtbã,  a yaa bũmb sẽn tõe n wa ne zu-loees b yõya koglg wɛɛngẽ. APẽndwẽnde Erik Zinaaba