par Sig-noy kiuug rasem 15 yʋʋm 2025 soabã Burkĩna Faso wen-vɩɩs a naasã pʋgẽ kʋdemdã la rog-n-mik la yel-gɛtbã maana b raarã naoor a yiib soaba. Kʋdemd la rog-n-mik raar naoor a yiib soabã Pãngsoab boola nin-buiidã tɩ b kẽes b toog n ges kambã wubr pʋgẽ. Yaa rẽ tɩ b yãk gom-zu-kãngã: Moos wubri, a yaa pʋʋgo, burkĩndlim, bãng-n-vʋɩɩmde, kʋdemd la rog-n-mik pʋgẽ.
Lamus raare, sig-noy kiuug rasem 15 yibeoog wakat a yopoe sasa nebã sega taab zama kõn bãng n sõd Pãngsoab samandẽ wã. Sẽn ya kʋdemd la rog-n-mik raarã, maana b arzũm raar fãa b sẽn mi n yit wa tãp makr tɩ b boond tɩ yiisgã.
Yiisgã sẽn wa n sa, Pãngsoab yika Ragno-neng “rap noore” n kẽ kn tɩ yi Ragno-bɛɛgẽ wã “Pagb noore”. B sẽn yi be, neb nins sẽn get sigrã siglg yell waa ne no-ra-pɛɛla, la pe-ra-peelse, tɩ Pãngsoab rɩk b nug n sɩɩs pesgã n kɩs Waogdgnaaba, tɩ b kẽng n tɩ kʋ n bõos tɩ tẽngã gãand bãane, la b bõos sa-ko-sõngo, sigl-sõngo, la laafɩ n kõ nebã tɩ b tõog n ko ne yĩn-maasem. Rẽ poore, b kɩsa Kaadyoognaaba, la Bagnaaba. Rũmsã fãa kõbg fãa ya a yembre. Kosgã me yaa kos-yɛnga.
Pãngsoab sẽn dɩk rũmsã n kɩs-b poore, b yikame n kẽ. Wiidnaab sẽn ya kug-zĩidbã taoor soabã rɩka koɛɛg Pãngsoab yʋʋr yĩnga. B togsa kiba-kɩtbã Pãngsoab sẽn kɩs rũmsã tɩ b kʋ bũmb ning yĩnga. B wilgame tɩ Pãngsoab yeelame tɩ b sã n dat tɩ kʋdemdã la rog-n-mikã kẽng taoore, segdame tɩ kambã la nin-buiidã fãa paam wub-sõngo. Rẽ la b na n tõog n bãng sõng la yook n bake, n tõog n bãng naag taab n vʋɩɩmd yõodo, la b waoog kasemba, tɩ b zĩnd-n-taar tall yamleoogo. Pãngsoab ratame tɩ kambã tõog n kelgd b roagdbã nin-kẽemsã la pʋg-yãansã saglse, n me wa tõog n dɩk n taas b kamb la b yagense, tɩ b sẽn paam bũmb ning fãa bɩ yɩ ba-yirã zãng n paame. Pãngsoab kɩsa rũms tɩ b kʋ n bõos tɩ tẽngã gãand bãane, la sigrã me yɩ sõma. Wiidnaab koeesã poore, kiba-kɩtbã la nebã kẽnga yĩn-wɩsgrã zĩig sẽn be Pãngẽ wã, n na n tɩ kelg sõs-kẽenga. B renga taoor n da zĩ n gũud Pãngsoaba.
Pãngsoab sẽn wa n watẽ, b pʋg-tãpã ra yãkda b fut n tɩʋʋd tẽng tɩ b tabg naam tabgre, la b gengd naam gengre. B sẽn wa n kolgdẽ, zama wã yika yĩngri. Pãngsoab sẽn kẽ n zĩndi, b kõo zama wã noor tɩ b zĩndi. Pãngsoab zĩndame tɩ b kom-dibli la b yagengs wa n ning-b kãnga, n wilg naam sẽn waoogd toto.
Pãngsoab zĩndgã poore, Wiidnaab leb n dɩka koɛɛg Pãngsoab yʋʋr yĩnga. Wiidnaab wilgame tɩ Pãngsoab pẽgda Kapitɛnd Yɩbrayɩɩm TARWORE ne a gosneema. B wilgame tɩ Pãngsoab sũur sẽn nooma, b maana Pẽgr kaset sɛb tɩ b kõ Depite rãmbã taoor soab a Wʋsmaan BUGMA n paas gosneerã taoor soab a Rĩmtallba Zã Emanwɛll WEDRAOOGO, la miniisr ning sẽn get tẽng gãand bãanã a Selɛstẽ SẼEMPOORE.
Kapitɛnd Yɩbrayɩɩm TARWOR yãka a Selɛstẽ SẼEMPOOR t’a zĩnd gosneemã yʋʋr yʋʋr yĩnga. Miniisrã koees pʋgẽ, a pẽga Pãngsoaba, b sẽn yãk gom-zugã tɩ ya kambã wubr yellã. Miniisrã wilgame tɩ zu-loees nins tõnd sẽn paamdã, a yãgrã fãa yaa wubrã kaalem, la tõnd sẽn bas d rog-n-mik vʋɩɩmã na-kẽndr n kẽng n tɩ kẽ neb a taabã tũudmã, n wa ne rẽ. Koeesã rɩgsg wakate Pãngsoab boola Miniisr kʋdr a Saglmay WEDRAOOGO, t’a me wa kõ a sũur koeese. A Saglmay wilgame t’a ra kẽ a Zezi Kiris tũudmã pʋgẽ, la f sã n tũud sor t’a ka kẽngd ne-f taoor bɩ f lebge.
Tigrã koe-zug yaa Waogdg Gʋngẽ Bɩnnaab wegs-a. Bɩnnaab wilga kambã wub-sõng yõod sẽn ya a soab n wilg nebã. Koeesã sẽn wa n kolgd weoogo, a NAANA Bibɛt tɩ b boond t’a Bibɛtkoɛɛg wa n deeme. Zĩtẽng yarsã reemame, t’a Bukasutg rãmb me tãoo solmde.
Wakat piig la a ye sẽn wa n looge, Pãngsoab yik n kẽ. Sõasdbã yɩɩ Saonaab a Kãoonga, Nemdnaab a Rɩtaam 2, Mise BADINI, Dogtɛɛr Patrik KƲRAOOGO, n paas pag a yembre. Saonaab wilga naamã zãab na-kẽndr sẽn segd n yɩ a soaba, la zu-loees nins sẽn be a pʋgẽ tɩ b segd n demse. Mise BADINI wɛgsa rog-n-mikã la kʋdemdã yõod n wilgi.
Dogtɛɛr KƲRAOOG togsa rog-n-mik wubrã, b pʋg-belengo, la b pʋg-kũuni, b pag pʋg puusgu, la b sẽn da zãad b burkĩnd toto. A wilgame tɩ moaag ra zoeta yãnde, a ra zoeta paoore
emdnaab a Rɩtaam 2 wɛgsa tẽn-gãongã koosg zu-loeese, la kiid faad pʋɩɩb yell n wilg zama wã. Sõasgã wa n tɩ baasa ne sʋgsgo, la leoobo.
Neb nins fãa sẽn zĩnd zĩigẽ wã sũur yɩɩ noogo, tɩ b kot Wẽnd ne ba-rãmba, la yaab rãmb tɩ b kell n yãag-b tɩ b maandẽ-a wakat fãa. D wa n sãeega taab zaabr wakat a 4 sasa. Wẽnnaam la Naabazɩɩdwẽnd leb n deega rog-n-mikã la kʋdemdã yel-gɛtb kosgo. A pipi yʋʋmdã saga nii kiuugã rasem 16 n pek rũmsã zɩɩm. A naoor a yiib soabã saga nii badaar zaabre, tɩ rẽ wilgdẽ tɩ b kosg reegame. Wẽnd na kell n kõ-d a taab yaka, n kɩt tɩ d maan n bãge.
A Pẽgdwẽnde Erik Zĩnaaba
