par Sapaolg kiuug rasem a 7 yʋʋm 2025 soabã Kapitɛnd Yɩbrayɩɩm TARWOR reega nin-sabls nins sẽn dog Amerik la Eropo, la Karayiib soolmẽ wã Waogdgo. Gom-zug tẽngã zãadb sẽn yãk n deeg-bã, yaa” ne y waoongo, yãmb tẽngẽ wã”. Sõasgã pʋgẽ, Kapitɛnd Yɩbrayɩɩm TARWOR wilgame tɩ neb nins sẽn da yõg nin-sablã n kẽes yembdã ne b sõangdbã sã n wʋm tɩ nin-sablsã rat n sooga b mense, a namsd-b-la wʋsgo, la sẽn ya a soab fãa, nin-sabls tẽnsã kom-bɩɩb yam pukame.
A wilgame t’a na n tʋmame tɩ Burkĩna Faso yɩ makre, tɩ neb a taabã bãng tɩ bãmb me tõe sooga b mense. Yaa neb ta bãmb 700 n zẽk b naoor n sig Burkĩna Faso, n na n wilg b sũur belem ne tẽngã taoor soaba a Kapitɛnd Yɩbrayɩɩm TARWORE. Tẽngã taoor soab pẽg-b lame, n wilg-b tɩ b yaa Burkĩna Faso no-rɛɛsdba. Bãmb sẽn yi nasaar tẽns n wa zĩnd Burkĩna Faso n gilg n maan b sẽn datã n lebg n kuus ne laafɩ wã, bãmb na n yɩɩ kaseto, tɩ nebã bãng tɩ nasaar wẽnsã sẽn ningd nebã zutẽ tɩ Burkĩna Faso la AES tẽnsã ka gãe bãanã, a ka tar tikr zĩig ye. Tẽngã taoor soab yeel-b-la woto:” tõnd maoorã ka Burkĩna Faso na paam a burkĩndã bal ye. Burkĩna Faso maooda nin-sabls tẽnsã yĩnga, la nin-sablg buudã fãa na paam a burkĩndã”.
A wilg-b lame tɩ sẽn kẽed ne b na paam Burkĩna Faso sɛb n tõe n zĩnd Burkĩna Faso wa b sẽn date, gosneerã taoor ra togsame tɩ yaood n be tɩ segd n yao, la yẽ yãka yaoodã n base. B sã n dat n pags tʋʋm-noy bɩ b wa pagse, tɩ gosneer na n maoome tɩ bũmb ra maan-b ye. B na n yãag-b lame tɩ b tõog n tʋm n nafe. Sãambã no-rɛɛsa Dogtɛɛr Arikana Sisombori-Kao togsame tɩ bãmb me na n yãaga tẽngã taoor dãmba, b yam yãkr buud fãa pʋgẽ. A wilgame t’a sũur yaa noogo, ne Kapitɛnd Yɩbrayɩɩm TARWORE, ne a gosneerã taoor soaba. A pẽg-b lame, tɩ bala, b sakame tɩ bãmb na n lebg n leb b yãgrẽ wã.
Tẽegre, b waa Burkĩna Faso zĩ-likr kiuug rasem 26 yʋʋm 2025 n gilg n seg neb ka tɛka, la b kõ kũun buud toor-toore. Wẽnd na leb n wa ne-b yʋʋmd sẽn wata. A Pẽgdwẽnde Erik Zĩnaaba
