par Sapaolg kiuug rasem 18 yʋʋm 2025 Burkĩna Faso tẽngã taoor soab a Kapitɛnd Yɩbrayɩɩm TARWORE, tɩ zĩndame tɩ b pak nasaara nug tʋʋm-te-paal b sẽn boond tɩ Nimerikã rasem a yapoe tig-kaseng naoor pissi soaba, Waogdg ka, Sɩyao wã zak pʋgẽ. Tigrã kʋlens pakr wakate Kapitɛnd pẽga tẽng gãand bãanã rãmb sẽn be weoogã pʋg n tʋmd wĩndg la yʋngã. A wilgame t’a sũur yaa noogo, bala, tẽngã nu-gãag zabrã wɛɛngẽ wã tẽeb la saagr beeme. A kell n togsame tɩ nasaar wẽngã ra magdame t’a na n lebsa Burkĩna Faso yõ-koglgã poorẽ, la kibay sẽn yi zabrã pʋg rasem a yopoe wã pʋgẽ, wilgdame tɩ bɛ wã raab ka na n tol n pid ye. Bala, zĩig fãa, nin-wẽnsã ne tẽng gãand bãanã rãmb lebga « wãamb zoe n bas a biiga ». Yaa rẽ t’a kos nebã tɩ b yik tɩ b yals yĩngr maan yĩn-kiiri, n tags tẽng gãand bãana rãmb yelle. Sẽn kẽed ne Nimerikã wɛɛngẽ, Kapitɛnd Yɩbrayɩɩm TARWOR yeelame tɩ yaa yʋʋm pissi, la Burkĩna Faso be-a pʋgẽ. Nebã sẽn seg taab n na n zĩnd rasem a yopoe wã pʋga,
a ratame tɩ b ges yʋʋm pissi wã sẽn loogã pugẽ tʋʋma, n bal n gese, b zoe kẽn n taa yae, la b rat n kẽng-a n ta zĩ-bʋgo. A wilgame 2023 tɛka, b kẽng taoor Nimerikã tʋʋm wɛɛngẽ la b segd n modgame n kell n kẽng taoor n paase. Bala, a ratame tɩ ka la yʋʋm a nu sẽn wata, bɩ b mik tɩ yaa wa b sẽn da be a pʋgẽ yʋʋm koabga. A kell n togsame tɩ Burkĩna Faso segd n lʋɩs-a-la taoore, n tõog tɩ ãndũni wã fãa pʋgẽ, bɩ Burkĩna Faso zĩnd sʋka. A wilgame tɩ rũnda-rũnda tʋʋmd ka le tõe n tʋm t’a ka be sʋk ye. B sã n dɩk Nimerikã n kẽes sʋka, a na n sõngame tɩ nin-yend sẽn dɩk neb ka tɛk tʋʋm n tʋmdẽ wã, bɩ rẽ kolg weoogo, t’a leb n kẽesd tẽngã laogo. A na n sõngame tɩ gosneem tʋʋma kẽng taoore. Yaa laafɩ wã wɛɛngẽ, tɩ yaa kaorengã, tɩ yaa yõ-koglgã zĩigẽ, bãmb fãa segdame tɩ b kẽes Nimerikã sʋka, sẽn na yɩl tɩ bũmbã fãa kẽng taoore. A kell n togsame tɩ b ka tõe n zab ne ninsaal yam raabã n tõog t’a ka zĩnd sʋk ye. B sã n dat zab ne-a t’a sa zãnga, rẽndame tɩ b kẽes Nimereikã zĩig fãa. Tɩ bala, tõnd tẽngã tara a tʋʋmde, yaa rẽ n kɩt tɩ gosneem kẽesd a toogo, sẽn na yɩl tɩ Nimerikã tall n tʋm lebg vẽenega. Tʋʋm-noya fãa sã n kẽes-a sʋka, a na n sõngame tɩ b zab ne ninsaal yam daabã. Yaa rẽ tɩ Kapitɛnd Yɩbrayɩɩm TARWOR rat tɩ neb nins sẽn tʋmd a pʋgẽ wã sẽn tar bãngr buud toor-toorã,
bɩ b rɩk-a kẽes sʋk gosneem tʋʋm-noya pʋgẽ t’a yaa bũmb sẽn tõe n sõng tɩ bɛ wã sã n na n ling n kẽ n maan sãoong bɩ b gɩbl tao-tao n seg-a t’a ka paam n ta ye. A wilgame tɩ rũndã zugã ned fãa ratame tɩ bũmb sã n yɩ pẽrɩ bɩ a togs tẽng gãand bãanã rãmb zĩig pʋgẽ tɩ b gɩbl tɩ ra sãam ye. Nimerikã fãaga neb ka tɛk yõya. Bala, a sõngdame tɩ b beool n seg nin-wẽnsã tɩ b ka tʋm yook ye. Yaa rẽ tɩ b rat tɩ b kẽes-a karen-dotã pʋse, la zĩig fãa.
A Pẽgdwẽnde Erik Zĩnaaba
