par Sẽoog kiuug rasem a 4 yʋʋm 2026 soabã Burkĩna Faso sull ning sẽn get tõnd rog-n-mik tɩɩsã la tɩɩs a taabã selb la b koglg galen-tẽnsẽ wã rɩka rasem a naas n sõs sõs-bɛd buud toor-toore, sẽn kẽed ne tɩɩsã selb la b koglg Sayall soolmã pʋga. Gom-zug b sẽn tik n maan-a yaa: Tɩɩg yõod galen-tẽnsẽ wã, d beoog vʋɩɩmã wɛɛngẽ.
Yaa gom-zu-kãng la b tik n maan tɩɩsã selb ra-kaseng b sẽn boond tɩ Sɩya wã naoor a nii soabã. Tigrã pak a kʋlens Waogdgo, Bãngrweoogo, sẽoog kiuug pipi raare 2026 yʋʋm soabã, n tɩ pag a kʋɩlens sẽoog kiuug rasem a naas raare. Rasm a naasã pʋgẽ yɩɩ sãamb buud toor-toore, la zãma kõn bãng n sõde, n zẽk b naoor n zĩnd zĩigẽ wã.
Sẽn na yɩl tɩ rasem a naasã seg taabã tall pãnga, la sẽn wat n get-bã raab sãndã tõog n pidi, b maana faare, tɩ neb seg taab n koos tɩɩse, la tɩɩs biisi, b vãado, la b yãg b sẽn dɩk n maan-b tɩ b lebg rɩ-rɩtem bɩ bõn-yũudum.
Tɩp tɩɩm dãmba, sʋn-wʋgdba, la neb sẽn maand kug ko-koag n kogend weoogã, la koaasdb katɛk sega taaba, tɩ ned fãa koos a sẽn tare, la a kõ a limor tɩ b sã n wa rat-a bɩ b bãng a zĩig n paam n da.
Pagb la rap yii Kaya, Bobo dɩʋlaso, Waogdgo, la tẽns taab n wa zĩnd faarã pʋgẽ, n koos la b bao bãngre, ne yam paala, n na n tɩ paas b tʋʋma taoor kẽnde.
Zaabr wakat a yiib sẽn wa n ta, Burkĩna Faso sull ning sẽn get tɩɩsã selb la b koglg taoor soab a Lazaar Dulkom, sẽn ya tigs-kãngã sigindã ne tɩɩs nanambsã la weoogã koglg taoor soaba, ne a Ãdma Dulkom wa n sega neb nins sẽn kẽ faarã ne b koosem buud toor-toorã, n sõs ne-b bilfu, la b kõ-b pɛlg kengr kaset sɛba.
Sõasgã pʋgẽ, mise Lazaar Dulkom wilga rasem a naasã tʋʋm sẽn kẽn toto, la saagr ning b sẽn saagd yʋʋm sẽn wate.
Rẽ poore, a wilgame tɩ yaa neb pisoob la zak n zẽk b naoore, n wa faarã, n na n wilg b tʋʋm minim tɩɩsã la wen-vɩʋʋgã koglg wɛɛngẽ. Mise Lazaar Dulkom pẽga neb nins sẽn yãag bãmb rasem a naasã pʋgẽ wã.
A pẽga Zɩnyãrnaab a Sãnem, Tuknaab a Tʋgre, la yõ-koglgã ministɛɛre. A kell n pẽga ministɛɛr ning sẽn weoogã la koomã ne a pʋgẽ teedo, la sull ning sẽn get Bãngrweoogã, n paas sula buud toor-toor sẽn yãag-ba, sẽn na yɩl tɩ tɩɩsã selb ra-kaseng naoor a nii soabã yɩ neere.
Kell n yɩɩ wakate, b sẽn bẽd n kõ neb nins sẽn wa faarã ne b koosem, b tɩp tɩɩm, la tɩɩs buud toor-toorã rãmb pɛlg kengr kaset sɛba.
Pɛlg kengr sɛbã ya a Ãdma Dulkom n deeg n taas-ba. Yõ-koglgã miniisr Mahamuudu Sãana ra segd n zĩnda sʋka, la a ka tõog n wa ye. A sẽn ka tõogã, a tʋma tɩɩs nanambsã la weoogã koglg tʋʋm-noor taoor soaba, t’a wa zĩnd a dɩk koɛɛg a yʋʋr yĩnga. A koeesã pʋgẽ, a pẽga tʋʋmdã wʋsgo. A kell n wilgame tɩ b sẽn tʋm tʋʋmd ningã sõngdame tɩ b zabd ne weoogã kʋɩɩse, la a le sõngd tẽn-gãongã. A kell n togsame tɩ tʋʋm-kãngã buudã yaa bũmb sẽn noom gosneer wʋsgo, hal tɩ b kẽesd b toogo, sẽn na yɩl tɩ yam yãk kãensã buudã rãmb sõor paase.
Wẽnd na kell n yãag sull ning sẽn sigl tʋʋmdã la b kõ-b pãng tɩ b kẽng taoor ne b yam yãkrã.
A Pẽgdwẽnde Erik Zĩnaaba
