par gʋlsgã na sɩnga tẽne wã rasem a 6 sẽoog kiuug yʋʋm 2026 n te tãag a rasem 30. Buudã goam lebgr ne gʋlsg la no-goamã Wags-taab-kasengã sẽn naamd Waogdgã a noor a 6 soaba tʋʋmdã tiglg sõasgã zĩndã rũndã daarã yamleoog pʋgẽ. Wags-taab-kẽoong-kãngã tʋʋmdã sigindã, a Adama Sooro, sẽn yaa kibay kɩt sẽn be Savan Mediya la le yaa Grup Ɛskolɛɛr Dĩyĩte taoor soaba, ne tʋʋmdã sɛb-gʋnda, a Laagi Sumayɩɩla Raabo, wilga kibay buud fãa sẽn kẽed ne rõandã wags-taabã.B sõasgã ne kibay kɩtba pʋgẽ, tʋʋmdã tʋɩɩsdbã yeelame tɩ gʋlsgã na n yɩ tẽne wã rasem a 6 sẽoog kiuug yʋʋm 2026 n te tãag a rasem 30. Sã n ya ne wags-taabã menga, a na n yɩɩ zĩ-likr kiuug sibr daar rasem a 3 yʋʋm 2026 Grup Ɛskolɛɛr Dĩyĩte, sẽn be Yagma.
Tʋʋmdã tʋɩɩsdbã kell n wilgame tɩ ya buud goam bãmb piig la a naas la sẽn na zĩnd wagsgã pʋga, burkĩnã buud goam a yopoe la tẽn-zẽms buud goam a yopoe me. Burkĩnã buud goam sẽn na zĩnd wagsgã pʋg la woto :- Moore – Fãrende ;- Busãamde – Fãrende ;- Gʋrende – Fãrende ;- Gurumdi – Fãrende ;- Silmiiri – Fãrende ;- Dagaabende – Fãrende ;- Zʋlle – Fãrende. tẽn-zẽms buud goam sẽn na zĩnd wagsgã pʋg la woto :- Ãngilindi – Fãrende ;- Ɛspayõlemde – Fãrende ;- Almaande – Fãrende ;- Larabɩɩmde – Fãrende ;- Tʋrkemde – Fãrende ;- Risimde – Fãrende ;- Snoaamde – Fãrende.Wags-taabã tʋɩɩsdbã kell n tẽegame tɩ tʋʋm-kãngã ya bũmb sẽn dabd taoore. Makre, rɩẽ wags-taabã gãndaoogã paama zaka la montɛɛre, tɩ wilgd tɩ tʋɩɩsdbã yam-yãkrã ya b keng paamdbã pelse ne kũunã paoosgo.À Laagi Abubakaar Zɩda, sẽn yaa Savan Mediya taoor soabã, pẽga tʋʋmdã la kell n pʋlem ne bãmb yãagrã rõandã wags-taabã yɛsa.Sõasg-kãngã ne kibay kɩtba paama zu-noog t’a Kaboore Kɩswẽndsɩda Rogbɛɛr zĩnd b sʋka, yaa ned ning sẽn dɩka Kũun-kasengã ne moorã la fãrendã goamã lebgrã yʋʋm 2022 la ne ãngilindã la fãrendã lebgrã yʋʋm 2024. B waa sõasgẽ wã tɩ bala b me ya kibay kɩta n kõ Zʋgnall Rãamde.Tʋɩɩsdbã baasame n wilgd tɩ neba fãa tõe n wa kẽe wags-taabã pʋga : tɩ fo ya karen-bi-bedre bi goam lebgr sɩngda bi goam lebgr tʋʋm-mita fo tõe n wa naagame. La sẽn zoe n yɩb gãndaad buud goam lebgr pʋga ka le tõe n maan wags-taabã ne buud goam bãmb pʋs ye, dall tɩ b toeem buud goam a taaba.Sõasgã baoosgã kell n yɩɩ wakat tɩ tʋɩɩsdbã tool boolle n boond neba tɩ b yi wʋsgo tɩ kũunã tõe n siga ned kam fãa zugu.Wẽnd na sik zu-noodã zembala wagsdbã fãa zutu. Paam-y tõkre : 78032411 / 77170172
Kibay kɩta: a Kaboore Kɩswẽndsɩda RobɛɛreZʋgnall Rãamd kibay kɩta
