Gõmpõosemnaab a Kugr kõo noor tɩ b na n gʋls b tẽngã sɩngr sebre

Sig-noy kiuug rasem 23 yʋʋm 2026 soabã, IKS sẽn ya seb-gʋndbã sɛb yiisg tʋʋm-no-kaseng n be Waogdgo, tʋʋm-noorã taoor soab a Sɩdnoomwẽnde Nestoor Koama zẽka a naoor ne a bãng-mitbã tɩ b kẽng Yaadg soolmã, Yaook tẽng ning b sẽn b boond tɩ Gompõosmã n tɩ maan kʋdemd vaees-n-bãng la rɩk-a n gʋls-a t’a lebg sebr nug tikr ne Gompõosemnaab a Kugri. Gompõosemnaab sẽn wa n yi tɩ b pʋʋs n sɩng n sõasgã, IKS taoor soabã a Sɩdnoomwẽnde Nestoor Koama togsa tʋʋmdã sẽn na n kẽn toto n tɩ tãag b sẽn gʋls-a t’a sebre, tɩ IKS reeg-a yiis-a t’a ya Gompõosem kʋdemd sebre. A sẽn togs tʋʋmdã sẽn na n kẽn toto la bõn-yõod nins fãa sẽn be a pʋgẽ wã, Gompõosemnaab a Kugr ne b nin-buiidã sũur yɩɩ noog wʋsgo. Rẽ poore, IKS maana nug tikr ne Gompõosemnaab a Kugri, b nin-buiidã fãa taoore.

Nug tikrã sẽn maanã IKS na n tʋma a Pẽgdwẽnde Erik Zĩnaab t’a kelg n tɩ sõs ne b nebã a yembr-yembre, tɩ ned fãa togs a sẽn mi b tẽngã kʋdemd la a rog-n-miki, la a nin-buiidã toor-toor waoong sẽn yɩ toto Gompõosem soolmã pʋgẽ. Vaeesgã sɩngda sigr kiuug rasem a 2 yʋʋm 2026 soaba. A Pẽgdwẽnde Erik na n tɩ sõsa ne Gompõosemnaaba, la b soolmã nin-buiidu, tɩ ned fãa togs a sẽn mi, la a sẽn yã, wal a sẽn wʋm tɩ b gomda.

Vaeesdã na n tika Gompõosem sɩngre, naab ning sẽn kõog tẽngã yʋʋre, la sẽn sɩng toto tɩ b wa pʋd tẽngã yʋʋr võor tɩ Gompõosem. A na n sʋkame n bãng nanambs sẽn dɩ, n tall n wa tãag rũndã naab a Kugr sẽn be Geerã zugã. A na n kell na n sʋkame n bãng naab fãa sẽn zĩnd n tʋm n bas kibay ninsi, la a naam rɩɩb yʋʋm sõore.

A leb n na n kelga Gompõosem naam sẽn dɩt toto, la b sẽn tũud soay ninsi. Vaeesdã na n sʋgsame n bãng Gompõosem rãmb sẽn maand rog-n-mik ninsi: sig-noor n tãag basga, b kʋya, b kamb sɩdb kũuni, la b pʋg-peegr sẽn maand toto. A na n sõsa ne-b n bãng b kisgu, la b zĩ-bãna. A na n sʋkame n bãng nebã buud toor-toor sẽn yi tẽns nins n wa, tɩ b naag taab n vʋɩ Gompõosem soolmẽ wã. A na n sʋkame n bãng tũudum nins sẽn be Gompõosem, la b sɩngr sẽn yɩ toto. Rẽ poore, a na n sõsa ne nin-buiidã n bãng Gompõosem tẽngã laogo, b sẽn da rɩkd tɩ ya bũmb tɩ b paamd n lut b bãongo. Sõasdã na n sõsame n bãng nasaar tʋʋma sɩngre, la bũmb nins fãa sẽn zĩnd Gompõosemnaab ne b nin-buiidã tẽnse, hal b sɩngr wẽnd n tãag rũndã.
A Pẽgdwẽnde Erik Zĩnaaba