par Sig-noy kiuug rasem 20 yʋʋm 2026 daare, yɩɩ Ineseta karen-biisã magb naoor a tãab soaba. Badaare, b pʋɩɩ karen-dotã zĩis a tãabo, tɩ bala, karen-biis a taab sẽn baood Bakã n da be karen-kaseng ning b sẽn mi n magdã pʋgẽ. Ra yaa karen-doog ne a bʋ-kaoodb tã. Karen-biig fãa sẽn wa ne a poorẽ dãmb yĩnga, zãma wã yɩɩ kõn bãng n sõde. B sẽn wa n na n sɩnge, b boola karen-biig fãa ne a zãma tɩ b yik n kẽ.
Karen-doog a yembrã pʋga, b sɩnga magbã ne a Sawadgo Nooswaooga. Koe-zug a Nooswaoog sẽn yãke, yaa « Kom-bɩɩbã tab toosã yũub Ziga komindã pʋgẽ». Koe-zugã wɛgsg pʋgẽ, a wilgame tɩ kom-bɩɩsã tab toos yũub tara pãng paasg Ziga komindã pʋgẽ, la yaa rẽ n kɩt t’a yãk yam n na n gom a goam tɩ b naag taab n bao yel-tɩɩm. A wilga tab toosã sẽn wat ne sabaab rãmb ninsi. A sebrã pʋgẽ, a kẽe Wẽnnaam sebrã pʋga, n bao n na n kõ zĩisi, la koe-zug ning a sẽn yãkã nan yaa zamaan-paalg yala. Wẽnnaam sebrã pʋgẽ ka tar zĩig sẽn gomd tab toos goam ye. La baasg fãa, a rɩka makr ne rã-toosã b sẽn da zoe n wilg a yel-beed a Lot zamaanẽ. A sẽn wa n karem n sa, bʋ-kaoodbã taoor soab a Abaas Kẽedrbeoogo, ne dogtɛɛr Zũndi Sãntalle, la Pastɛɛr Sãmwɛll Korg sʋgs-a-la sʋgsg buud toor-toore, t’a me leo a sẽn mi.
Tab toosã sẽn ka be Wẽnnaam sebrã pʋgã, t’a yaool n dat n gom a goamã, a Abaas kõo Pastɛɛr Sãmwɛll Korg sor tɩ b wɛgs n wilg-a a sẽn da segd n kẽes vẽenem nins a gʋlsgã pʋgẽ, tɩ b bãng t’a sẽn gomd goam ninsã ra ka be pĩnd ye, la yaa bũmb sẽn nan yaool n wa zamaanã pʋgẽ n tar a zu-loeese. Pastɛɛr Korg kell n kõ-a-la sagls buud toore-toore, t’a na n tɩ maneg tɩ fãa yɩ sõma. Bʋ-kaoodbã me kell n wilg-a-la zĩis t’a tɩ rems tɩ tũ moorã gʋlsg no-tũuri.
Karen-dot a tãabã fãa tʋʋm na-kẽndr kell n ya a yembre. Yaa karen-biigã karem tɩ b kelge, n sʋgs-a t’a leo, tɩ bʋ n kao a bʋʋdo, n kõ-a a sẽn segd n paam pall ninga. Badaar pipi magbã wa n tɩ saa wĩntoog piig la a yiibã pʋgẽ.
Karen-biis kẽer paama koabg zug piig yoobe, piig la a yoob la pʋsʋka. Sãnda paama koabg zug piig la a yopoe. La b yeelame tɩ karen-biig fãa paoong seka a na paam Lisãase.
Sẽn paam-b pal-bɛd tɩ yɩɩd a taabã zĩigẽ, a Ezayɩ Zɩɩdwɛɛmb zĩnda sʋka. A Ezayɩ Zɩɩdwɛɛmb yãka koe-zug sẽn gomd yolgemdã kaalem Waogdg Arõndiism a naasã pʋgẽ wã. A goma yolgemd kaalmã yelle, tɩ bʋ-kaoodbã kelg-a, n sʋgs-a sʋgsg buud toor-toor t’a padme. Bʋ-kaoodbã kelg-a lame, la b kell n kõ-a vẽnegr a taab n paase, la b wilg-a zĩis nins b sẽn yã tɩ ket n tar bãn tɩ b rat t’a rems tɩ tũ moorã gʋlsg no-tũuri.
A Pẽgdwẽnde Erik Zĩnaaba
