par Bãngr yaa sodaas sula katɛk sẽn na n dɩk b pães n fãoog taab n kẽ zab-bɛdã pʋgẽ.
B zãmsgã sɩnga tʋʋl-nif kiuug rasem a 4 n tall n tãag sig-noy kiuug rasem 8 yʋʋm 2026 soabã. Yaa sodaar karen-do-kẽeng ning b sẽn boond tɩ Akademi Militɛɛr Zors NAMOANO wã la Ekoall nasnall de Su Ofisiye Dagtiv ÃNSOA rãmb n dɩk zabrã mams-n-gɛsg bãng-paal sẽn kẽed ne zabã sẽn be nug ningã bãngr n taas karen-biisi, tɩ b na n yi n lebg zabr gãn-daado. Zãmsdbã rɩka sodaar bãngre, n taas karen-biis 1800, tɩ b sʋkã Ofiisiye karen-biis yaa 208, tɩ Su Ofiisiye karen-biis ya 1318.
Su Ofiisiye rãmb sẽn na n yãagd zab-zabdbã yaa bãmb 300. Bãmb 300 wã na n tolg n yɩɩ sodaas b sẽn yãk n kõ-b yam paal la bãng-minim buud toor-toore, zabr ning tõe sẽn be a soab pʋgẽ wã bãngre.
Karen-biisã yaa: Pelatõ rãmba, Batayõ Belende bãngdba, zab-zabdb sẽn kell n be zĩig pʋgẽ tɩ sã n wa ya (Yik t’a waame bɩ mik tɩ b ra boben-dõbame) la zab-te-paalã bãngr sodaase. Leb n yaa sodaas sẽn mi Burkĩna Faso zabrã sɩlse, la zab-te-paal buud toor-toor sẽn nan wa-bã zab-zabdba, sodaas sull b sẽn boond tɩ Zeni Militɛɛrã, la zabr yaab rãmb sẽn na n tolg n beẽ tɩ b tʋʋmd ya zab-bɛd-kãensã buud bal la b yãk-b tɩ b tʋmdẽ.
Zãmsgã karen-saam-dãmb yaa sodaas sẽn zĩnd zabrã pʋgẽ n paam minim la bãngr buud toor-toor a pʋgẽ, n dɩk b bãngrã n taas karen-biisã.
Zãmsgã raab yaa sẽn na n yɩlẽ tɩ Burkĩna Faso sodaas nins sẽn ya zab-zabdbã segl b mense, tɩ zabrã sẽn wa n ta nug ning fãa bɩ mik tɩ b ra zoe n daoolame n gũud-a.
Zãms-kãngã poore, b na n leb n zãms sodaas sula taoor dãmb sẽn tõe n zã zabrã la b rɩkd noor wakat fãa n zabd n fãagd b tẽngã.
Ned ning sẽn zẽk a naoor n tɩ zĩnd Etamazoor Zenerallã yʋʋr yĩng yaa Kolonell Hamed H. ROAMBA. Kolonell ROAMBA wilga a sũ-noogo, zãmsgã sẽn kẽn sõma wã, la a tũ taoor wala sẽn segdã yĩnga. A pẽga karen-biisã ne b karen-saam-dãmbã. A wilgame tɩ zãms-kãngã kell n segda ne zab-bɛd nins tõnd tẽnsã sẽn be a soab pʋgẽ wã.
Kibarã yii Sodaarã tʋʋm-noorẽ t’a Rãamd rɩk-a n pʋɩt ne-yã.
